राष्ट्रवादी अर्बन सेल तपासणार शहर विकासाची नाडी : खासदार वंदना चव्हाण

अमरावती : राज्यातील विविध महापालिका क्षेत्रांतर्गत नागरिकांना आवश्‍यक असलेल्या मूलभूत सुविधा आजवर उपलब्ध होऊ शकल्या नाहीत. हा मुद्दा कायम दुर्लक्षित राहत असल्याने आता राष्ट्रवादी अर्बन सेलच्या माध्यमातून शहरी भागातील नागरी समस्यांवर "फोकस' करण्यात येणार आहे. त्यासाठी निवेदने, मोर्चा, आंदोलनाचे शस्त्र उगारले जाणार आहे, अशी माहिती अर्बन सेलच्या अध्यक्ष खासदार वंदना चव्हाण यांनी आज येथे दिली.
यावेळी उपाध्यक्ष आमदार विद्या चव्हाण, प्रदेश सचिव सुरेश पाटील उपस्थित होते.
वंदना चव्हाण म्हणाल्या की, राज्यातील विविध महापालिका क्षेत्रांमध्ये अनेक विकासात्मक प्रयोग होत आहेत. त्याच धर्तीवर आपल्या क्षेत्रातील महापालिकांमध्ये प्रयोग करता येईल का, याची चाचपणी सेलच्या माध्यमातून केली जाणार आहे. त्यासाठी शहरस्तरावर 25 पदाधिकाऱ्यांची टीम गठित केली जाणार आहे. अनेक महापालिका क्षेत्रांमध्ये आजही मूलभूत सुविधांची वानवा आहे. त्या पूर्ण करण्यासाठी सेलच्या माध्यमातून पक्षाचे पदाधिकारी व कार्यकर्ते काम करतील. महिलांसाठी सार्वजनिक प्रसाधनगृह, आरोग्याच्या सोयीसुविधा, सार्वजनिक प्रसाधनगृहांमधील अस्वच्छता, ज्येष्ठ नागरिकांच्या समस्या यांसह 26 मुद्द्यांवर अर्बन सेल काम करणार आहे. नागरिकांच्या समस्या जाणून घेऊन त्या सोडविण्यासाठी किंवा एखादा नवीन प्रयोग शहरात राबविण्यासाठी प्रशासन तसेच स्थानिक लोकप्रतिनिधींना निवेदन देऊन तसेच गरज पडल्यास आंदोलनाच्या माध्यमातून सेलचे काम सुरू राहणार असल्याचे खासदार चव्हाण यांनी सांगितले.
पत्रकार परिषदेला राष्ट्रवादी कॉंग्रेसच्या प्रदेश सचिव तथा जि.प.च्या माजी अध्यक्ष सुरेखा ठाकरे, प्रदेश महासचिव सुरेश पाटील, राष्ट्रवादीचे शहराध्यक्ष प्रशांत महल्ले, सुचित्रा वनवे, अविनाश मार्डीकर आदी पदाधिकारी उपस्थित होते.