हिंगणा विधानसभेसाठी राष्ट्रवादीकडून चाचपणी

हिंगणा (जि. नागपूर) :  विधानसभेच्या निवडणुकीसाठी राष्ट्रवादी कॉंग्रेस पक्ष उमेदवारांची चाचपणी सुरू झाली आहे. याचाच एक भाग म्हणून राष्ट्रवादी कॉंग्रेसचे ज्येष्ठ नेते माजी मंत्री रमेशचंद्र बंग यांनी प्रमुख पदाधिकारी व कार्यकर्त्यांची बैठक घेऊन संवाद साधला. यावेळी शेकडो पदाधिकारी व कार्यकर्त्यांची उपस्थिती होती.
22 ऑगस्ट रोजी माजी मंत्री रमेशचंद्र बोस यांच्या निवासस्थानी विधानसभा क्षेत्रप्रमुख पदाधिकारी व कार्यकर्त्यांची बैठक पार पडली. माजी मंत्री रमेशचंद्र बंग यांनी प्रमुख पदाधिकारी व कार्यकर्त्यांना आपली मते मांडण्यास सांगितले. विधानसभा निवडणुकीत उमेदवार कोण असावा, यावर विचारमंथन करण्यात आले. उपस्थित काही कार्यकर्त्यांनी माजी मंत्री बंग यांनी उभे राहावे, अशी मागणी रेटून धरली. तर काही कार्यकर्त्यांनी वेगळी भूमिका मांडली. सर्व कार्यकर्त्यांची मते जाणून घेण्यात आली. सर्वाधिक कार्यकर्त्यांची मते माजी मंत्री रमेशचंद्र बंग यांच्या बाजूने दिसली. विधानसभेच्या तयारीच्या दृष्टीने सर्वाधिक मोठी बैठक ठरली. विधानसभा क्षेत्रातील प्रत्येक गावातील प्रमुख पदाधिकारी या बैठकीला उपस्थित होते.