रस्तेही नाहीत आणि पूलही नाही! गावकरी करतात जीवावर उदार होऊन नदीतून प्रवास

ब्रह्मपुरी (जि. चंद्रपूर) : स्वातंत्र्याने सत्तरी पार केली. तरीही देशातील अनेक प्रदेश आजही प्राथमिक सुविधांपासून वंचित आहेत. उर्वरीत जगाशी संपर्क प्रस्थापित करणारे रस्ते आणि पूलही येथे नाहीत. चंद्रपूर-गडचिरोली हे विदर्भातील जिल्हेही याला अपवाद नाहीत. या प्रदेशातून अनेक नद्या वाहतात. त्यामुळे पावसाळ्यात या गावांचा इतर जगाशी संपर्क तुटतो आणि इथले जीवन ठप्प होते.

ब्रह्मपुरी तालुक्‍यातील लाडज हे गाव वैनगंगा नदीच्या काठावर वसले आहे. सभोवताल नदी वाहते. पावसाळ्याच्या दिवसांत नेहमीच गावाचा मुख्यालयाशी संपर्क तुटतो. त्यामुळे पुलाची मागणी नागरिकांनी केली होती. त्याची दखल घेत पुलाचे काम मंजूर झाले. निधीही मंजूर झाला. मात्र, अजूनही काम थंडबस्त्यात पडले आहे. आता पावसाळा लागला. यंदाही धोकादायक प्रवास नागरिकांना करावा लागणार आहे.

लाडज हे वैनगंगा नदीच्या काठावर वसले आहे. गावाच्या सभोवताल वैनगंगा नदी वाहते. गावातील लोकांना दळणवळण करण्यासाठी नदीतूनच एकमेव मार्ग आहे. पावसाळ्यात या रस्त्यावरून नदी वाहते. त्यामुळे येथून ये- जा करताना मोठी कसरत करावी लागते. गर्भवती महिलांना वेळेवर दवाखान्यात घेऊन जाताना अनेक संकटांचा सामना करावा लागतो. गावात सहावीपर्यंतची शाळा आहे. पुढील शिक्षणासाठी ब्रह्मपुरीला जावे लागते. हा प्रवास विद्यार्थ्यांना नावेतून करावा लागतो.

या गावात 2016, 2017, 2018,2019 या काळात महापूर आला. अनेकांचे मोठे नुकसान झाले. तेव्हापासून या रस्त्यावर पुलाची मागणी नागरिक करीत आहेत. त्यासाठी लाडज व चिखलगाव येथील नागरिकांनी लोकसभा निवडणुकीवर बहिष्कार टाकला. त्यानंतर प्रशासनाने पूल बांधून देण्याचे आश्‍वासन दिले. त्यानंतर या पुलाच्या बांधकामासाठी निधी मंजूर करण्यात आला. मोठा गाजावाजा करून भूमिपूजन करण्यात आले. मात्र, आतापर्यंत या पुलाच्या कामास सुरुवात झाली नाही. आता पावसाळा सुरू झाला. त्यामुळे नागरिकांना नदीतून प्रवास करावा लागणार आहे.
पर्यायी मार्ग करा

सविस्तर वाचा - हुंडाबळी! सुनेपेक्षा कार झाली मोठी, शारीरिक व मानसिक त्रास अन...

लाडज गावातील लोकांना तालुक्‍याच्या ठिकाणी जाण्यासाठी अजूनही रस्ता तयार करून देण्यात आलेला नाही. पावसाळा सुरू झाला आहे. त्यामुळे पर्यायी रस्ता तरी तयार करून द्यावा, अशी मागणी लाडज, चिखलगाववासींनी केली आहे. त्यासंदर्भात तालुका प्रशासनाला गावकऱ्यांनी निवेदन दिले आहे.