खुशखबर! आता एका क्लिकवर मिळणार व्यवसाय परवाना; बाजार आणि परवाना विभागात खेटे मारणे वाचणार 

अमरावती :  उद्योगांकरिता लागणाऱ्या व्यवसाय परवाना न नूतनीकरण परवाना आता ऑनलाइन मिळू लागला आहे. महापालिकेने उपलब्ध करून दिलेल्या या सुविधेमुळे व्यावसायिकांना मनपाच्या बाजार व परवाना विभागात खेटे मारावे लागणार नसून बसल्या जागी परवाने मिळवणे सुकर झाले आहे. आतापर्यंत 370 व्यावसायिकांनी ऑनलाइन परवाने घेतले असून महापालिकेस त्या माध्यमातून 17 लाख रुपयांचा महसूल मिळाला आहे, असे उपायुक्त अमित डेंगरे यांनी सांगितले.

महापालिकेच्या क्षेत्रात जवळपास 22 हजार व्यवासायिक आस्थापना आहेत. व्यवसाय व उद्योग करण्यासाठी तसेच नूतनीकरणासाठी परवाना घेणे आवश्‍यक असून बाजार व परवाना विभागाकडून तो दिल्या जातो. त्यासाठी कागदपत्रांची जुळवाजुळव करून या विभागाकडे सादर केल्यानंतर वारंवार खेटे मारावे लागतात. अशा तक्रारींचा सुर वाढला होता. 

सविस्तर वाचा - कडाक्याच्या थंडीत वाढली हुरड्याची रंगत; चुलीवरच्या जेवणासाठी गावाकडे धूम

परवान्यासाठी जाणाऱ्या व्यावसायिकांना संबंधित कर्मचारी सहकार्य करीत नाहीत, वेळेवर उपलब्ध होत नाहीत अशा तक्रारींसह आतबट्ट्याचा व्यवहार केल्याशिवाय दिल्या जात नाही अशा तक्रारी आहेत.

संगणकीकरणाच्या दिशेने पाऊल टाकताना आयुक्त प्रशांत रोडे यांनी बाजार व परवाना विभागावर भर देत परवाने देण्याची प्रक्रिया ऑनलाइन करण्याचे आदेश दिले. उपायुक्त अमित डेंगरे यांना ही जबाबदारी देण्यात आली आहे. गेल्या दोन महिन्यात आतापर्यंत 329 व्यावसायिकांनी ऑनलाइन अर्ज दाखल केले व परवाने प्राप्त केले.

क्लिक करा - बंगल्यामागे आढळली मानवी मृतदेहाची कवटी; ओळख पटताच उपस्थितांच्या अंगाचा उडाला थरकाप

परवाने ऑनलाइन मिळण्याची सुविधा उपलब्ध करून दिल्याने व्यावसायिकांचा वेळ वाचण्यासोबतच विभागात खेटे मारण्याचा त्रास वाचला आहे. महापालिकेसही कमी मनुष्यबळात महसूल मिळवण्याचा मार्ग मिळाला आहे. गेल्या दोन महिन्यात महापालिकेस 17 लाख रुपये महसूल मिळाल्याची माहिती उपायुक्त अमित डेंगरे यांनी दिली.

संपादन - अथर्व महांकाळ