चोरांचा कांद्यावर डोळा; कांदाचाळीतून अडीच लाखांचा कांदा चोरी

नेरपिंगळाई (जि. अमरावती) : सोन्याचे दागदागिने, रक्कम चोरीच्या घटना नेहमीच ऐकण्यात येतात. परंतु, आता चोरांनी आपला मोर्चा कांद्याकडे वळविला आहे. कांद्याचे दर दिवसेंदिवस वाढत असल्यामुळे कांद्याच्या अडीच लाख रुपये किमतीच्या गोण्याच चोरण्याचा प्रकार मोर्शी तालुक्यातील नेरपिंगळाई शेतशिवारात २७ जुलैच्या रात्री घडली. (Onion-theft-Panic-among-farmers-Amravati-Crime-News-nad86)

नेरपिंगळाई येथील कांदा व्यापारी अब्दुल हकीम अब्दुल रहीम व शेख मुर्तुझा गुलाम हुसेन यांनी धानोरा येथील रमाकांत यावले यांची कांदाचाळ भाड्याने घेऊन कांद्याची साठवणूक केली होती. या कांदाचाळीची ग्रील वाकवून चोरट्यांनी २२० गोणी कांदा चोरून नेल्याची घटना उघडकीस आली आहे. यामुळे व्यापाऱ्यांना अडीच लाखांचे नुकसान झाले.

शेतात मध्यरात्री रखवालदार नसल्याचा फायदा घेत चोरट्यांनी कांदाचाळीत साठवून ठेवलेल्या कांद्याला लक्ष्य करीत चोरी केली. काही दिवसांपासून बाजारामध्ये कांद्याची आवक कमी झाल्यामुळे किरकोळ बाजारात कांद्याचे भाव दोन हजार रुपये क्विंटल झालेत. कांद्याची मागणी वाढत असल्यामुळे हे भाव अजून वाढण्याची शक्यता आहे.

अनेक शेतकऱ्यांनी कांदा शेतातील कांदाचाळीत साठवला आहे. या चोरीच्या घटनेने शेतकऱ्यांमध्ये दहशतीचे वातावरण निर्माण झाले आहे. या घटनेचा तपास शिरखेडचे ठाणेदार केशव ठाकरे यांच्या नेतृत्वात बीट जमादार श्यामसिंग चुंगडा, मनोज टप्पे, किरण बांबल, नीलेश देशमुख, रामेश्वर इंगोले, अनुप मानकर करीत आहेत.

(Onion-theft-Panic-among-farmers-Amravati-Crime-News-nad86)