मद्यविक्रीला झाली सुरुवात, सीमांवरील गस्त वाढणार

अमरावती : मध्यप्रदेशची आंतरराज्यीय, जिल्ह्याची आणि तालुक्‍याच्या सीमेवरील तपासणी आणखी कडक केली जाणार आहे. जिल्ह्याच्या ग्रामीण भागात शुक्रवारपासून (ता.8) मद्यविक्री सुरू झालेली आहे. तब्बल 46 दिवसांनंतर मद्यविक्री सुरू झाली असल्याने मद्यपींची त्याठिकाणी गर्दी होण्याची शक्‍यता तसेच मद्य खरेदीसाठी तालुका, जिल्हा आणि राज्याच्या सीमा ओलांडल्या जाण्याची शक्‍यता असल्याने सीमेवरील तपासणी आणखी कडक केली जाणार आहे. 

तालुका आणि जिल्ह्याच्या तसेच राज्याच्या सीमेवर अत्यावश्‍यक सेवा वैद्यकीय सेवा तसेच कृषी मालाची ने-आण करण्यासाठी खुल्या राहतील. त्या व्यतिरिक्त इतर कुणाला पासेस शिवाय ये- जा करता येणार नाही. आदेशाचे उल्लंघन करताना आढळणाऱ्या व्यक्तींवर कठोर कारवाई केली जाणार असल्याचे जिल्हाधिकारी शैलेश नवाल यांनी सांगितले. अमरावती शहरात महापालिकेतर्फे आस्थापना तपासणीचे व त्याठिकाणी नियमांचे पालन केले जात आहे किंवा नाही याची पाहणी सुरू आहे.

क्लिक करा - आग्रहाखातर तो सासरी राहायला गेला; मात्र, पत्नीचे दुसऱ्याशी सूत जुळल्याने घडला थरार...

महापालिकेच्या पथकाने तब्बल 37 ठिकाणी अशा पद्धतीची कारवाई केलेली आहे. या पद्धतीची कारवाई नगरपालिका क्षेत्रात सुद्धा केली जाणार आहे. दैनंदिन व्यवहार टप्प्याटप्प्याने सुरळीत करण्याच्या दृष्टिकोनातून ही उपाय योजना केली जात आहे. त्यासाठी नागरिकांनी नियमांचे पालन करावे, असेही जिल्हाधिकारी म्हणाले. जिल्ह्यात आगामी कालावधीत लोकांची वर्दळ कमी करण्यासाठी होम डिलिव्हरी या संकल्पनेवर भर दिला जाणार आहे. त्यामध्ये इलेक्‍ट्रिक वस्तू, स्वीट मार्टच्या वस्तू, भाजीपाला इत्यादी वस्तूंचा विचार केला जातो आहे.

खरीप कर्जासाठी काही शेतकऱ्यांना तलाठ्याच्या स्वाक्षरीचा सातबारा मिळत नसल्याचे व बँका त्यासाठी अडवणूक करीत असल्याचे समोर येत आहे, याबाबत जिल्हाधिकाऱ्यांना विचारले असता बँकांना ऑनलाइन सातबारा स्वीकारण्याचे निर्देश यापूर्वीच देण्यात आलेे आहे, असे त्यांनी सांगितले. 

जिल्ह्यात दोन ठिकाणी मजूरांअभावी कापूस खरेदी प्रभावित झाली, मात्र सद्यःस्थितीत टोकण पद्धतीने आतापर्यंत सरकारी यंत्रणेमार्फत चार लाख 65 हजार 243 क्विंटल तर खासगी व्यापाऱ्यांमार्फत एक लाख क्विंटल कापूस खरेदी झाला असल्याचे जिल्हाधिकाऱ्यांनी सांगितले.

हेही वाचा - नवरदेव आला अन् नवरीला दुचाकीवर घेऊन गेला...वाचा...कसे लागले लग्न?
एक महिन्याचा मद्यसाठा

जिल्ह्याच्या ग्रामीण भागात शुक्रवारपासून मद्य विक्रीला सुरुवात झाली. विदेशी मद्याची 12, बिअर शॉपीची 5 तसेच देशी दारूची 93 दुकाने उघडण्यात आली. त्यापैकी विदेशी दारू व देशी दारू विक्रीला सकाळी आठ ते दुपारी तीन या वेळेत तर बिअर शॉपीला सकाळी दहा ते दुपारी तीन या वेळेत परवानगी देण्यात आली. जिल्ह्यात तब्बल एक महिना पुरेल इतका मद्यसाठा असल्याची माहिती सूत्रांकडून प्राप्त झालेली आहे.