तरुणासह विधवा महिलेने घेतले विष, चार दिवसांपासून होते बेपत्ता

भिडी (जि. वर्धा) : वाबगाव येथील 35 वर्षीय विधवा महिला व 22 वर्षीय तरुणाने विष प्राशन करून आत्महत्येचा प्रयत्न केला. हे दोघे मागील चार दिवसांपासून गावातून बेपत्ता होते. गावालगत नाल्याच्या पुलाखाली ते अत्यवस्थ स्थितीत आढळून आले. दोघांवर जिल्हा सामान्य रुग्णालयात उपचार सुरू असून, त्यांची प्रकृती गंभीर आहे.

वाबगाव येथील या महिलेच्या पतीचे दोन वर्षांपूर्वी निधन झाले. तिला दोन मुले आहेत. गौरव विजय भागवत नामक युवकही याच गावात राहतो. हे दोघे मागील चार दिवसांपासून गावातून बेपत्ता होते. नातलग त्यांचा शोध घेत होते. गौरवजवळ असलेल्या दुचाकीने हे दोघे बाहेरगावी फिरत होते. गुरुवारी (ता. चार) सायंकाळी ते गावाजवळ येऊन एका शेतात रात्रभर थांबले. मध्यरात्रीनंतर तीन ते चार वाजताच्या सुमारास त्यांनी विष प्राशन केले व तेथून रत्नापूर-वाबगाव मार्गावरील पुलाखाली येऊन थांबले.

अमरावतीत आणखी चार नवीन रुग्ण; एकूण कोरोनाबधित 263

विषाचा अंमल सुरू झाल्याने दोघेही अत्यवस्थ स्थितीत पडून राहिले. दुचाकी नाल्याच्या बाजूला खाली पडून होती. दरम्यान, गावातील नागरिकांना दुचाकी पडून असल्याचे दिसले. त्यांनी शोध घेतला असता गौरव आणि महिला पुलाखाली अत्यवस्थ स्थितीत पडून असल्याचे दिसले. लागलीच पोलिस पाटील यांना माहिती देण्यात आली. दोघांनाही तातडीने भिडी येथील प्राथमिक आरोग्य केंद्रात आणण्यात आले. येथे त्यांच्यावर प्राथमिक उपचार करण्यात आले.

विष प्राशन केल्यानंतर बराच वेळ पडून असल्याने विष संपूर्ण अंगात पसरल्याचे सांगितले जाते. त्यामुळे दोघांचीही प्रकृती गंभीर असल्याचे समजते. त्यांना वर्धा येथील जिल्हा सामान्य रुग्णालयात हलविण्यात आले. या घटनेची देवळी ठाण्यात नोंद असून, पोलिस पुढील तपास करीत आहेत. या घटनेमुळे गावात खळबळ उडाली असून, नागरिकांमध्ये उलटसुलट चर्चा सुरू आहेत.