मनात धास्ती, चेहऱ्यावर नाराजी तरीही पोलिस आहेत कर्तव्यावर

गोंदिया : कोरोनाच्या लॉकडाऊनमध्ये सगळे नागरिक आपापल्या घरात सुरक्षित असताना पोलिस मात्र त्यांच्या सुरक्षेची काळजी घेत कर्तव्य बजावत आहेत. परिणामी राज्यात पोलिसांमध्ये कोरोनाग्रस्तांचा आकडा वाढला. हा वाढता आकडा लक्षात घेता पन्नास वर्षावरील पोलिसांना कार्यालयातच ड्युटी देण्याचे आदेश असतानाही त्यांना बंदोबस्तासाठी पाठविले जात आहे.

कोरोना विषाणूचा प्रादुर्भाव रोखण्यासाठी नेमणुकीस असलेल्या पोलिस अधिकारी, कर्मचाऱ्यांना कोरोनाची लागण होत असल्याचे निदर्शनास आले आहे. विशेषतः 50 किंवा त्यापेक्षा अधिक वयोगटातील लोकांना याची लागण होण्याचा धोका जास्त आहे. त्यामुळे विशेष पोलिस महानिरीक्षकांनी 50 ते 55 वर्षे वयोगटातील पोलिस अधिकारी, कर्मचाऱ्यांनी कार्यालयातच कर्तव्य बजावावे, त्यांना रजा हवी असल्यास ती द्यावी, असे पत्र पोलिस ठाण्यांना धाडले.

परंतु, गोंदियात यानुरूप अंमलबजावणी होताना दिसत नाही. आजही या वयोगटातील बहुतांश पोलिस कार्यालयात नव्हे, बाहेर बंदोबस्तात कर्तव्य बजावत आहेत. परिणामी पोलिसांमध्ये नाराजीचा सूर तर आहे.

राज्यात कोरोना विषाणूचा प्रादुर्भाव दिवसेंदिवस वाढतो आहे. शिवाय बरे होणाऱ्या रुग्णांच्या संख्येतही वाढ होत आहे. गोंदिया जिल्ह्यात बुधवारी (ता. 10) शेवटचा पॉझिटिव्ह रुग्ण बरा होऊन घरी परतला. ही जमेची बाजू असली तरी, पुन्हा कोरोना विषाणूचा उद्रेक होऊ नये याकरिता शासन, प्रशासनाने लादलेल्या नियमांचे पालन करणे गरजेचे आहे. परंतु, खुद्द शासन, प्रशासन नियमांना किंबहुना आदेशाला सुरुंग लावत असल्याचे दिसते. पोलिस अधिकारी, कर्मचाऱ्यांच्या बाबतीत गोंदियात सारेच नियम धाब्यावर बसविण्यात आले आहेत.

राज्यातील पोलिस अधिकारी, कर्मचाऱ्यांना कोरोना विषाणूची लागण होत असल्याचे निदर्शनास आले. यामध्ये विशेषतः 50 ते त्यापेक्षा अधिक वयाच्या लोकांना याची लागण होण्याचा धोका जास्त आहे. हेच हेरून शासन, प्रशासनाने आरोग्याची काळजी म्हणून या वयोगटातील पोलिस अधिकारी, कर्मचाऱ्यांना कार्यालयीन ड्युटी देण्यात यावी, पोलिस अधिकारी, कर्मचाऱ्यांनी त्यांच्या आरोग्याच्या दृष्टीने रजा मागितल्यास रजा द्यावी किंवा जनतेशी संपर्क येणार नाही, अशा ठिकाणी त्यांची नेमणूक करण्यात यावी, मधुमेह, उच्च रक्तदाब, हृदय व रक्तवाहिन्यांसंबंधी समस्या आदींचा आजार असल्यास तसा आढावा घेऊन कमीत कमी संपर्क येईल, अशा ठिकाणी नेमणूक देण्यात यावी, असे विशेष पोलिस महानिरीक्षकांनी पत्रात नमूद केले आहे.

मात्र, या पत्रानुसार, कार्यवाही होताना दिसत नाही. 50 ते 55 वर्षे वयोगटातील पोलिस अधिकारी, कर्मचारी आजही बाहेर बंदोबस्तात ऑनड्युटी आहेत. त्यामुळे त्यांच्यात नाराजीचा सूर आहे.

सविस्तर वाचा - मुंढे साहेब, सातशे जणांना क्‍वारंटाईन करण्याची वेळ कोणामुळे आली आता माफी मागा...

जिल्ह्यात 60 पेक्षा अधिक कर्मचारी कार्यरत
जिल्ह्यातील पोलिस ठाण्यांत 50 ते 55 वयोगटात 60 पेक्षा अधिक पोलिस अधिकारी, कर्मचारी कार्यरत आहेत. त्यांनी या कालावधीत वरिष्ठांच्या आदेशानुसार कर्तव्य बजावले आहे आणि बजावतदेखील आहेत. त्यांच्या मनात भीती मात्र कायम आहे.