पोलिसांनी नक्षल्यांच्या घातपाताचा प्रयत्न हानून पाडला, पेरून ठेवलेली स्फोटके केली जप्त

गोंदिया : सालेकसा तालुक्यातील गेंडूरझरिया जंगलात पोलिसांना ठार मारण्याच्या उद्देशाने नक्षलवाद्यांनी पेरून ठेवलेली स्फोटके पोलिसांनी जप्त केली. ही कारवाई आज, शनिवारी (ता. २६) संध्याकाळी करण्यात आली.

पोलिस अधीक्षक विश्व पानसरे यांना सालेकसा पोलिस ठाण्यांतर्गत दरेकसा घाटाजवळील गेंडूरझरिया पहाडी जंगलात घातपात घडवून पोलिसांना जीवे मारण्याच्या उद्देशाने नक्षलवाद्यांनी स्फोटके पेरून ठेवले असल्याची माहिती मिळाली होती.

जाणून घ्या : "वो झोपडीमे नही आते, उनकी फोटो लगाके त्यौहार मनाता लेता हू!"

त्यानुसार पोलिस अधीक्षक पानसरे यांच्या नेतृत्वात सी-६० सालेकसा येथील कमांडो पथक, बीबीडीएस पथक, सालेकसा पोलिस ठाण्यातील अधिकारी व कर्मचाऱ्यांनी गेंडूरझरिया पहाडी जंगलात शोध मोहीम राबविली.

श्‍वानपथकाद्वारे पाहणी

गेंडूरझरिया पहाडीच्या उतार भागात दगडाच्या एका कपारीमध्ये काही संशयास्पद वस्तू आढळून आल्याने श्वानपथक व बीडीडीएस पथकाने पाहणी केली. तेव्हा तेथे नक्षलवाद्यांनी स्फोटके साहित्य लपवून ठेवल्याचे दिसून आले. त्यानंतर ती स्फोटके बाहेर काढण्यात आली.

अवश्य वाचा : भाचीचा वाढदिवस त्यांच्यासाठी ठरला अखेरचा; अज्ञात वाहनाच्या धडकेत दोन युवक ठार

२७ नग इलेक्ट्रॉनिक डिटोनेटर

या साहित्यामध्ये स्टील डबा, १५० नग स्फोटक कांड्या सिल्वर, २७ नग इलेक्ट्रॉनिक डिटोनेटर असे स्फोटक साहित्य आढळून आले. प्रकरणी सालेकसा पोलिस ठाण्यात गुन्हा नोंदविण्यात आला आहे. या घटनेचा तपास उपविभागीय अधिकारी जालींदर नालकुल करीत आहेत. पोलिसांनी नक्षल्यांच्या उद्देशावर पाणी फेरल्याने त्यांचे धाबे दणाणले आहेत.

(संपादन : दुलिराम रहांगडाले)