दीपाली चव्हाण आत्महत्या प्रकरण; अधिकारी रेड्डी आणि अटकेतील शिवकुमारवर मोठी कारवाई

नागपूर : आर.एफ.ओ. दीपाली चव्हाण यांनी गुरुवारी सायंकाळी हरिसाल येथे शासकीय निवासस्थानी स्वत:च्या सर्व्हिस रिव्हॉल्हरमधुन गोळी झाडून आत्महत्या केली होती. आत्महत्येपूर्वी त्यांनी स्वत:च्या हस्ताक्षरात लिहिलेली चार पानाची चिठ्ठी धारणी पोलिसांनी जप्त केली. त्या चिठ्ठीमध्ये उपवनसंरक्षक शिवकुमार यांच्या त्रासाचा उल्लेख होता. याच पार्श्वभूमीवर आज शिवकुमारला नागपुरातून अटक करण्यात आली. शिवकुमारवर निलंबनाची कारवाई करण्यात आली आहे. तर अधिकारी रेड्डी यांना त्वरित पुढील कारवाईच्या आदेशांपर्यंत मुख्य कार्यालयात हजार राहण्याचे आदेश देण्यात आले आहेत. 

हेही वाचा - दीपाली चव्हाण आत्महत्या प्रकरण; उपवनसंरक्षक शिवकुमार नागपुरातून अटकेत; आत्महत्येस प्रवृत्त...

अपर प्रधान मुख्य वनसंरक्षक व क्षेत्रसंचालक मेळघाट व्याघ्रप्रकल्प, अमरावती एम.एस.रेड्डी यांच्या नावे सदर चिठ्ठी दीपाली चव्हाण यांनी लिहिली आहे. कुणाच्याही ऐकण्यावरुन वारंवार निलंबित करणे, चार्जशिट दाखल करण्याची धमकी शिवकुमार यांच्याकडून मिळत होती. पुनर्वसनाची जबाबदारी असल्यानंतर ग्रामस्थांसमोर अनेकदा आपली बाजू ऐकून न घेता शिवकुमार यांनी शिवीगाळ केली. रजा कालावधीमधील सुटी नाकारण्याची शिफारस सुद्धा त्यांनी केली होती. असे दीपाली यांनी आत्महत्येपूर्वी लिहिलेल्या चार पानाच्या चिठ्ठीत नमुद केले आहे.

तसंच गर्भवती असताना उपवनसंरक्षक शिवकुमार यांनी मालुर मध्ये कच्च्या रस्त्याने फिरवीले. त्यामुळेच गर्भपात झाला. त्यानंतर रजा सुद्धा दिली नाही. अमरावतीत सासर असताना महिन्यातून एकदाही घरी जाता आले नसल्याची खंत दीपाली चव्हाण यांनी आत्महत्येपूर्वी लिहिलेल्या चिठ्ठीतुन व्यक्त केली होती. त्यानुसार ही कारवाई करण्यात आली आहे. 

हेही वाचा - "माझं बाळ मला परत द्या हो"; दीपाली चव्हाणच्या आईचा टाहो; उपस्थितांच्याही...

एम. एस. रेड्डी यांना दिपालीनं वारंवार सूचित केल्यानंतरही त्यांनी तिच्याकडे दुर्लक्ष केलं आणि म्हणूनच रेड्डी यांच्यावर कारवाई करण्यात येणार आहे. मात्र पुढील आदेशांपर्यंत मुख्य कार्यालयात हजर राहण्याचे आदेश देण्यात आले आहेत. या प्रकरणी रेड्डींवर काय कारवाई होणार हेच बघावे लागेल.   

संपादन - अथर्व महांकाळ