Accident : मोटार अपघातात सहा जण मृत्युमुखी

काटोल (जि. नागपूर) - भरधाव ट्रकच्या धडकेत मोटारीचा चुराडा होऊन सहा जणांचा मृत्यू तर एक जण गंभीर जखमी झाल्याची घटना सोनखांब व ताराबोडी दरम्यान शुक्रवारी रात्री घडली. मृत काटोल तालुक्यातील मेंढपठार येथील एकाच गावचे रहिवासी असून, ते नागपूर जिल्हा परिषदेचे माजी उपाध्यक्ष चंद्रशेखर चिखले यांच्या मुलीच्या लग्नाचा स्वागत समारंभ आटोपून घरी परतत होते.

मयूर मोरेश्वर इंगळे (वय २२), विठ्ठल थोटे (वय ४२), अजय दशरथ चिखले (वय ४०), वैभव चिखले (वय ३०), रमेश ओमकार हेलोंडे (वय ५३), सुधाकर रामचंद्र मानकर (वय ५२) हे यामध्ये मृत्युमुखी पडले, तर माजी सरपंच जगदीश ढोणे (वय ४५) हे यामध्ये गंभीररीत्या जखमी झाले आहेत.

घटनेची माहिती मिळताच गावकऱ्यांसह माजी गृहमंत्री अनिल देशमुख यांनी घटनास्थळी धाव घेतली. जखमींना तातडीने उपचारासाठी हलविण्यात आले. सहाही मृतांवर शनिवारी मेंढपठार येथे एकाच ठिकाणी अंत्यसंस्कार करण्यात आले.