शेगाव : खून प्रकरणात संशयितांची छायाचित्रे प्रसिद्ध

शेगाव : शहरात रविवारी राजेश उर्फ गणेश गजानन बोदडे या युवकाची दगडाने ठेचून हत्या करण्यात आल्याची घटना उघडकीस आली होती. २ तरुणांनी ही हत्या केल्याचा संशय पोलिसांनी व्यक्त केला आहे. मात्र, खूनाच्या घटनेनंतर हे दोघेही संशयित तरुण फरार आहेत. त्यामुळे तपासासाठी पोलिसांनी दोघा संशयितांचे छायाचित्र जारी केले आहे.

रविवारी सकाळी जानोरी रेल्वे गेट जवळील जुन्या रस्त्यावर राजेश उर्फ गणेश गजानन बोदडे (३०) या युवकाची दगडाने ठेचून हत्या करण्यात आली होती. राजेशवर शुल्लक कारणावरुन एका भिकाऱ्याला ठार मारल्याचा आरोप होता. आणि नुकताच तो तुरुंगातून जामिनावर सुटून आला होता. राजेशची हत्या लाशा उर्फ राहूल समाधान रावंणचोरे (२२) आणि बुऱ्या सुरेश यादव (२३) या दोन तरुणांनी केली असल्याचा संशय पोलिसांनी व्यक्त केला आहे.

ज्या दिवशी हत्या झाली त्याच्या एक दिवस आगोदर हे दोघेही संशयित तरुण मृतकासोबत असल्याचे तपासात समोर आले आहे. मात्र, हत्येच्या घटनेनंतर ते दोघेही फरार आहेत. त्यामुळे त्यांना शोधण्यासाठी पोलिसांनी त्यांचे छायाचित्र प्रसिद्ध केले आहे.  तपास ठाणेदार गोकुळ सूर्यवंशी करत आहेत.