नववर्षाच्या पहाटेला दोन शेतकऱ्यांची आत्महत्या

उमरखेड (जि. यवतमाळ) : तालुक्‍यातील साखरा येथील युवा शेतकरी अनिल केशवराव वानखेडे (वय 35) यांनी स्वतःच्या शेतामध्ये नापिकीला व कर्जबाजारीपणाला कंटाळून नववर्षाच्या पहाटेला विष पिऊन आत्महत्या केली. संपूर्ण विश्व नववर्षाच्या स्वागताचा जल्लोष साजरा करत असताना तालुक्‍यातील साखरा येथील युवा शेतकरी अनिल वानखेडे यांनी मात्र सततची नापिकी व कर्जबाजारीपणाला कंटाळून नववर्षाच्या सकाळच्या सुमारास विष घेतले. त्याच्यापश्‍चात आई, पत्नी, एक मुलगा व दोन मुली असा आप्तपरिवार आहे.
टाकरखेडा संभू (जि. अमरावती) : येथून जवळच असलेल्या आष्टी येथे दादाराव भीमराव जुवार (वय 53) या शेतकऱ्याने नापिकीमुळे गळफास लावून आत्महत्या केल्याची घटना मंगळवारी (ता.1) घडली.
अल्पभूधारक शेतकरी असलेले दादाराव जुवार यांच्याकडे 3 एकर शेती आहे. या शेतामध्ये कपाशी टाकली होती. मागील वर्षीदेखील बोंडअळीमुळे उत्पन्न झाले नाही. यावर्षीदेखील निसर्गाच्या लहरीपणामुळे त्यांना नापिकीला सामोरे जावे लागले, अशी चर्चा आहे. त्यांच्या पश्‍चात पत्नी, 3 मुली, 2 मुले आहेत. मागील वर्षी दोन मुलीचे लग्न झाले होते. उसनवारी करून त्यांनी यावर्षी कसेबसे शेत पेरले. परंतु, उत्पन्नाची हमी नसल्याने आणि उसनवारीचे देणे असल्याने या विवंचनेत त्यांनी आत्महत्या केली.