नागपूरचा पारा ४७.२ अंशांवर

नागपूर - नवतपा संपल्यानंतर आता मॉन्सूनच्या प्रतीक्षेत असलेल्या नागपूरकरांना आज उन्हाचे तीव्र चटके सहन करावे लागले. शहरात ४७.२ अंश सेल्सिअस तापमानाची नोंद झाली.

शहरात दिवसभर अंगाची लाही लाही होत असताना सायंकाळी मात्र, काही भागात ऊन-पावसाचा खेळ चालू होता. त्यामुळे दुपारी चारनंतर थोडा गारवा जाणवल्याने नागपूरकरांना उन्हापासून थोडा दिलासा मिळाला. गेल्या दोन-तीन दिवसांपासून सुरू असलेला ऊन-पावसाचा खेळ आणखी काही दिवस कायम राहणार आहे. 

प्रादेशिक हवामान विभागाने दिलेल्या रेड अलर्टचा सर्वाधिक फटका बुधवारी नागपूरकरांना बसला. येथे ४७.२ अंश सेल्सिअस तापमानाची नोंद करण्यात आली. मंगळवारपेक्षा आज अधिक ऊन होते. शहरात दुपारी उन्हाचे चटके व उकाडा जाणवल्यानंतर सायंकाळी अचानक वातावरण बदलले. सायंकाळच्या सुमारास पूर्व नागपुरातील अनेक भागांत हलक्‍या सरी कोसळल्या.