थर्टी फर्स्टच्या रात्री सुरू होती झिंगाट पार्टी अन्‌ शेतात घडले असे...

आगरगाव (जि. वर्धा) : सरत्या वर्षाला निरोप आणि येणाऱ्या नवीन वर्षाचे स्वागत करण्यासाठी अनेक ठिकाणी तरुणाई बेभान होऊन झिंगाट रंगली. थर्टीफस्टची पार्टी सुरू असताना दोन मित्रांचा शेतातील विहिरीत पडून मृत्यू झाला.

आगरगाव-लोणी मार्गावरील बालू ऊर्फ सुरेंद्र अंदूरकर यांच्या शेतात मंगळवारी (ता. 31) रात्री ही घटना घडली. गौतम चिंधू फुलझेले (वय 48) आणि किरण तुळशीराम देशमुख (वय 48, रा. आगरगाव), अशी मृतांची नावे आहेत. 

शेतात पार्टी झाली जीवघेणी 

आगरगाव येथील मयूर सुरेशराव देवघरे यांनी बालू ऊर्फ सुरेंद्र अंदूरकर यांचे शेत ठेक्‍याने केले आहे. सरत्या वर्षाला निरोप व नववर्षाच्या स्वागतासाठी मयूर देवघरे, गौतम फुलझेले, दामू नेहारे, किरण देशमुख यांनी शेतात पार्टी करण्याचा आधीच बेत आखला होता. ठरल्याप्रमाणे रात्री चौघेही सर्व साहित्य घेऊन शेतात गेले. शेतातील विहिरीलगतच या चार मित्रांनी छोटेखानी पार्टी सुरू केली. 

असे का घडले? : वादावादीत पतीने घेतला गळफास

सोबतचे मित्र घाबरले 

दरम्यान, गौतम फुलझेले आणि किरण देशमुख यांचा विहिरीत पडून मृत्यू झाला. सोबतचे मित्र विहिरीत पडल्याने दामू नेहारे व मयूर देवघरे घाबरले. त्यांनी थेट गावात येऊन ग्रामस्थांना व पुलगाव पोलिसांना माहिती दिली. माहिती मिळताच पोलिस निरीक्षक रवींद्र गायकवाड, चंदू खोंड, बलदेव भुते आणि पोलिस पथकाने घटनास्थळाला भेट देऊन पंचनामा केला. 

अवश्‍य वाचा : बापरे... चोरट्यांनी केले एटीएम लंपास

मृतदेह बाहेर काढले 

यानंतर दोघांचे मृतदेह विहिरीतून बाहेर काढण्यात आले. या घटनेमुळे गावावर शोककळा पसरली आहे. या प्रकरणी पुलगाव पोलिसांनी आकस्मिक मृत्यूची नोंद केली आहे.