बापरे! हा जिल्हा झाला कोरोनामुक्त; मात्र, ओढावले नवे संकट

वाशीम : जिल्हा कोरोनामुक्त असताना जिल्ह्यात सारीचे पाच रुग्ण आढळल्याने जिल्हा आरोग्य यंत्रणा व जिल्हा प्रशासन सतर्क झाले आहे. औरंगाबाद येथे धुमाकुळ घालणाऱ्या या सारीचा प्रादुर्भाव जिल्ह्यात झाल्याने जिल्हावासीयांसमोर नवीन संकट ठाकले आहे. असे असले तरी, या पाचपैकी चार रुग्ण उपचारानंतर सुखरूप घरी गेल्याने दिलासा मिळाला आहे. हा आजार कोरोनासारखाच लक्षणांचा समूह असून, त्याच्या चाचण्या सुरू असल्याची माहिती मिळाली आहे.

या संदर्भात जिल्हा आरोग्य अधिकारी डॉ. अविनाश अहेर यांनी दिलेल्या माहितीनुसार, तीव्र ताप, खोकला अशी कोरोना सदृश्य लक्षणे असलेल्या व सरळ-सरळ श्‍वसन संस्थेवर हल्ला करणारा लक्षणांचा समूह म्हणजेच सारी आजार होय. या सारीचे पाच रुग्ण वाशीम जिल्ह्यात आढळले. शासनाच्या निर्देशाप्रमाणे यांचीही ‘एच1- एन1’ आणि ‘कोविड19’ ची चाचणी करण्यात आली. पण, त्यांना ‘एच1- एन1’ अथवा ‘कोविड19’ चा संसर्ग आढळला नाही. त्यानंतर त्यांच्यावर उपचार करून त्यांना घरी पाठविण्यात आले.

महत्त्वाची बातमी - हृदयद्रावक : पोहण्यासाठी त्याने मारली विहिरीत उडी अन्...

दरम्यान, जिल्हा शल्य चिकित्सक डॉ. अंबादास सोनटक्के यांनी दिलेल्या माहितीनुसार ‘सारी’ सदृश्य रुग्ण जिल्हा सामान्य रुग्णालयात असून, त्याचे नमुने अकोला येथील प्रयोगशाळेत पाठविण्यात आले आहेत. त्याचा अहवाल अद्याप प्रलंबीत आहे. त्या ‘सारी’ सदृश्य रुग्णाची प्रकृती स्थिर असल्याचेही त्यांनी सांगितले. औरंगाबादनंतर प्रथमच वाशीम जिल्ह्यात आढळलेल्या या ‘सारी’च्या रुग्णामुळे जिल्ह्याची आरोग्य आणि प्रशासकीय यंत्रणा सतर्क झाली आहे, एवढे मात्र निश्‍चित!

तिघांचे ‘स्वॅब’ नमुने प्रयोगशाळेत
जिल्हा सामान्य रुग्णालय प्रशासनाकडून आज (ता.29) तीन रुग्णांचे ‘स्वॅब’ नमुने तपासणीसाठी प्रयोगशाळेत पाठविले आहेत. यामध्ये एक महिला ही कामरगाव येथील आहे. दुसरी महिला ही कोरोना बाधित क्षेत्रातून आलेली गर्भवती महिला आहे. तर तिसरा रुग्ण हा ‘सारी’ सदृश्य आजार असलेला आहे. अशी माहिती जिल्हा शल्य चिकित्सक डॉ. अंबादास सोनटक्के यांनी दिली आहे.