वर्धा : साधारणत: शासनाच्या कारभारात परवानगी येते; पण साहित्याचा पुरवठा होत नसल्याचा इतिहास आहे. येथे साहित्याचा पुरवठा झाला. पण, परवानगी नाही अशी स्थिती जनावरांना दरवर्षी देण्यात येणाऱ्या लसीकरणाबाबत घडली आहे. शासनाकडून लस पाठविण्यात आली; परंतु, ती जनावरांना देण्याबाबतचे परवानगीपत्र पाठविण्याचा पुणे येथील पशुसंवर्धन विभागाला विसर पडला. परिणामी, उन्हाळ्यातील लसीकरणापासून जनावरे वंचित राहण्याची वेळ आली आहे.
जनावरांसाठी मोफत लसीकरण
या लसीअभावी वाढत्या तापमानात जनावरांना लाळ्या खुरकूत या आजाराची लागण होण्याची शक्‍यता निर्माण झाली आहे. राज्यातील गाय आणि म्हैसवर्गीय जनावरांना ही लस शासनाच्या वतीने मोफत देण्यात येते. याकरिता विविध शिबिरांत पशुपालकांना आमंत्रित करून ही लस जनावरांना देण्यात येते. यावर्षी मे महिना संपायला आला तरी ही लस जनावरांना अद्याप देण्यात आलेली नाही.
शासनाच्या योजनांचा आधार घेत राज्यात अनेक पशुपालकांनी शेतीला जोडव्यवसाय म्हणून दुग्धव्यवसाय सुरू केला आहे. या व्यवसायात गायी आणि म्हशींचा समावेश आहे. शिवाय ही लस मिळाली नसल्याने होणारा लाळ्या खुरकूत हा आजार याच वर्गातील जनावरांना होत असल्याचे पुढे आले आहे. यात बैलांचाही समावेश आहे. शेती हंगाम जवळ आल्याने शेतकऱ्यांकरिता बैल महत्त्वाचे ठरतात. अशात जर या आजाराने जनावरांवर आक्रमण केले तर त्याचा शेती हंगामावर निश्‍चितपणे दुष्परिणाम होईल.
उन्हाळ्याच्या दिवसांत शासनाकडून जनावरांना ही लस देण्यात येते. यंदा या लसीकरणाबाबत पशुसंवर्धन विभागाकडून काहीच सूचना आल्या नाहीत. याबाबत विचारणा केली असल्यास लस उपलब्ध आहे. पण, ती जनावरांना देण्यासंदर्भात परवानगी नसल्याचे विभागाकडून सांगण्यात येत असल्याने हा नेमका काय प्रकार आहे, असा प्रश्‍न पशुपालकांना पडला आहे.
राज्यात झालेल्या 19 व्या पशुगणनेनुसार वर्धा जिल्ह्यात दोन लाख 84 हजार 985 जनावरांची नोंद आहे. यात गायवर्गीय (गाय, बैल, वासरू) 2 लाख 48 हजार 130, तर म्हैसवर्गीय जनावरे 36 हजार 855 आहेत. या सर्व जनावरांना ही लस उन्हाळ्याच्या काळात देणे अपेक्षित होते. पण, महिना संपत आल्याने ही जनावरे या लसीपासून वंचित राहण्याची वेळ आली आहे.
उन्हाळ्याच्या दिवसांत लस देण्याचा कार्यक्रम दरवर्षी राबविला जातो. या कार्यक्रमाकरिता लसीचा साठा आला आहे. तो सर्वत्र वाटपही करण्यात आला आहे. परंतु, ती जनावरांना देण्यासंदर्भात अद्याप पुण्यावरून आदेश आलेले नाही. यामुळे जनावरे सध्या लसीपासून वंचित आहेत. आदेश येताच ती देण्यात येईल.
-डॉ. राजीव भोजने, पशुसंवर्धन आयुक्‍त, वर्धा
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.