यवतमाळ : दरोड्याची तक्रार देणाराच निघाला खरा सूत्रधार

यवतमाळ : दुचाकीने बॅगमध्ये रोकड घेऊन जात असताना सहा जणांनी दोघांना रस्त्यात अडवून बेदम मारहाण केली. तसेच तीन लाख 20 हजार रुपयांची रोकड असलेली बॅग लुटून पोबारा केला. ही घटना गुरुवारी अकोलाबाजार ते बोरगाव रोडवर दुपारी सव्वाबारा वाजता घडली, असा बनाव करून दरोड्याची तक्रार देणाराच खरा सूत्रधार निघाला.

अजय राजू तायकोटे (वय 27, रा. सावरगड) असे सूत्रधाराचे नाव आहे. तो मागील तीन वर्षांपासून ऊस तोडणीसाठी साखर कारखान्याला मजूर पाठविण्याचे काम करीत आहे. साडभाऊ रामेश्‍वर गुळये (रा. पिंपळदरी, जि. हिंगोली) हादेखील मजूर पाठविण्याचे काम करतो. त्यामुळे तरुणाने चार महिन्यांपूर्वी चार लाख रुपये साडभावाला मागितले होते. गुरुवारी दोघेही तीन लाख 20 हजार रुपयांची रोकड बॅगमध्ये घेऊन अकोलाबाजार येथून घोटीकडे जात होते. सहा जणांनी रस्त्यात दोघांनाही अडवून मारहाण केली. जबरदस्तीने रोकड असलेली बॅग हिसकावून पळ काढला.

याप्रकरणी अजय तायकोटे याने वडगाव जंगल पोलिस ठाण्यात तक्रार दिली. त्यावरून अनोळखी सहा जणांविरुद्ध गुन्हा नोंदविण्यात आला होता. याप्रकरणी अपर पोलिस अधीक्षक खंडेराव धरणे यांनी एलसीबीच्या पथकासह घटनास्थळी धाव घेतली. साडभावाला गुन्ह्याबाबत विचारणा केली असता, देहबोली व बोलण्याच्या पद्घतीत तफावत आढळली. एलसीबी पथकाने इंट्रॉगेशन कौशल्याचा वापर केला. तायकोटे याने भाऊ व मित्राच्या मदतीने दरोड्याचा कट रचला. घटनास्थळावरूनच फिर्यादीला ताब्यात घेतले. वडगाव जंगल, अवधूतवाडी व एलसीबीच्या पथकाने पाच जणांना अटक केली. या गुन्ह्यातील अन्य दोघे फरार आहेत. ही कारवाई पोलिस अधीक्षक डॉ. दिलीप पाटील भुजबळ, अपर पोलिस अधीक्षक डॉ. खंडेराव धरणे, पोलिस निरीक्षक प्रदीपसिंह परदेशी यांच्या मार्गदर्शनात सहायक पोलिस निरीक्षक पवन राठोड, सपोनि विवेक देशमुख यांच्यासह पथकाने केली.