Balasaheb Sanap: शिक्षक बदली प्रक्रियेत, Suresh Dhas, Sandip Kshirsagar यांच्यावर गंभीर आरोप

बीड जिल्ह्यात २०१४ साली झालेल्या जिल्हा परिषद शिक्षक आंतर जिल्हा बदली प्रक्रियेत तब्बल ३९ कोटी रुपयांचा घोटाळा झाल्याचा गंभीर आरोप ओबीसी नेते बाळासाहेब सानप यांनी केला आहे. बीडमध्ये आयोजित पत्रकार परिषदेत ते बोलत होते. सानप यांच्या म्हणण्यानुसार, तत्कालीन मंत्री सुरेश धस, जिल्हा परिषद अध्यक्ष सय्यद अब्दुल्ला आणि शिक्षण सभापती संदीप क्षीरसागर यांच्या कार्यकाळात हा घोटाळा झाला. बीडमधील बिंदू नामावली घोटाळ्याच्या पार्श्वभूमीवर सुरेश धस यांनी तक्रार केल्यानंतर हा मुद्दा ऐरणीवर आला आहे. २०१४ ते २०२४ या दहा वर्षांच्या कालावधीत बिंदू नामावलीचा प्रश्न कधीच उपस्थित झाला नव्हता. मात्र आता आमदार सुरेश धस जाती-जातीत तेढ निर्माण करण्याचा प्रयत्न करत असल्याचा आरोप सानप यांनी केला. तसेच, धस यांनी राज्याचे मुख्यमंत्री आणि उपमुख्यमंत्री यांची दिशाभूल केल्याचेही सानप यांनी सांगितले. या प्रकरणावर पुढील मंगळवारी शिक्षकांचे शिष्टमंडळ मुख्यमंत्री, उपमुख्यमंत्री, मंत्री अतुल सावे आणि ग्रामविकास मंत्री यांची भेट घेणार असल्याची माहिती सानप यांनी दिली.