मुंबईला येण्याआधीच जरांगे पाटलांनी उपोषण सोडलं, फडणवीस बघा काय म्हणाले?

Maratha Reservation: मराठा आरक्षणाच्या विविध मागण्यांसाठी उपोषणाला बसलेल्या मनोज जरांगे पाटील यांनी अखेर आपले उपोषण मागे घेत आंदोलनाला तात्पुरती स्थगिती दिली आहे. या निर्णयावर महाराष्ट्राचे मुख्यमंत्री देवेंद्र फडणवीस यांनी पहिली अधिकृत प्रतिक्रिया व्यक्त केली आहे. मनोज जरांगे यांनी उपोषण मागे घेतल्याचा अत्यंत आनंद असून राज्य सरकार त्यांच्या मागण्यांबाबत नेहमीच सकारात्मक राहिले असल्याचे फडणवीस यांनी सांगितले. जरांगे यांच्या प्रमुख १३ मागण्यांपैकी १२ मागण्या सरकारने आधीच मान्य केल्या असून उर्वरित मुद्द्यांवर कायदेशीर चौकटीत तोडगा काढण्याचे आश्वासन त्यांनी दिले. मराठा समाजाला जे काही हक्क आणि आरक्षण मिळाले आहे, ते आमच्या सरकारच्या काळातच मिळाले असून सर्व आश्वासनांची पूर्तता केली जाईल, असा ठाम विश्वास मुख्यमंत्र्यांनी व्यक्त केला.