केळी दरात किंचित सुधारणा

प्रतिनिधी
मंगळवार, 22 मे 2018

जळगाव - रावेर, यावलमध्ये केळीची आवक वाढलेली असतानाच सध्या मुस्लिम बांधवांच्या रमजान पर्वामुळे केळीची मागणीही बऱ्यापैकी आहे. रावेरातून दिल्ली, जम्मू काश्‍मीरच्या व्यापाऱ्यांकडून आगाऊ नोंदणी करून सध्या खरेदी सुरू असून, दर आणखी १५ ते २० दिवस बऱ्यापैकी राहतील, असे संकेत आहेत. 

जळगाव - रावेर, यावलमध्ये केळीची आवक वाढलेली असतानाच सध्या मुस्लिम बांधवांच्या रमजान पर्वामुळे केळीची मागणीही बऱ्यापैकी आहे. रावेरातून दिल्ली, जम्मू काश्‍मीरच्या व्यापाऱ्यांकडून आगाऊ नोंदणी करून सध्या खरेदी सुरू असून, दर आणखी १५ ते २० दिवस बऱ्यापैकी राहतील, असे संकेत आहेत. 

सध्या दर्जेदार केळीला क्विंटलमागे १५० रुपये ऑन मिळत आहे. त्यात एकाच शेतकऱ्याची १५ ते १६ मेट्रिक टन केळी असली, तर त्यास ऑन आणखी वाढवून दिली जात आहे. दिल्ली येथील व्यापारी केळीचा साठा आपल्याकडे प्री कूलिंग चेंबर, रायपनिंग चेंबरमध्ये करून घेत असून, खरेदीही रोजची सुरू आहे. रावेरमधून सध्या रोज २०० मेट्रिक टन केळी दिल्ली, उत्तर प्रदेश, जम्मू काश्‍मिर व पंजाबमध्ये पाठविली जात असून, १६ किलोच्या बॉक्‍समध्ये केळीची पॅकिंग केली जात असल्याचे सांगण्यात आले. केळीला मागील आठवड्याच्या सुरवातीला १०५० रुपये प्रतिक्विंटलचे दर होते. ऑन फक्त निर्यातक्षम किंवा परदेशात पाठविल्या जाणाऱ्या केळीला काही कंपन्या देत होत्या. परंतु रमजान सुरू होताच दरात क्विंटलमागे ३० रुपयांनी सुधारणा झाली आहे. दिल्ली व जम्मू काश्‍मिरातील व्यापाऱ्यांनी केऱ्हाळे, खिर्डी, ऐनपूर, निंबोल, कुंभारखेडा, रसलपूर, मस्कावद, चिनावल, निंभोरा आदी ठिकाणच्या लहान व्यापारी व मोठ्या शेतकऱ्यांशी आगाऊ रकमा देऊन सौदे केले आहेत. 

यामुळे दरात किरकोळ तेजी आली आहे. सध्या आंब्यांची आवकही वाढली आहे. ही आवक पुढील महिनाभर वाढतच राहील. अशात केळीच्या बाजारावर परिणाम होण्याची शक्‍यता होती, परंतु रमजान महिन्यामुळे दर टिकून राहतील. पुढील २० दिवस दर स्थिर राहतील किंवा आणखी किंचित वाढतील, अशी माहिती मिळाली आहे. 

केळी दरात किरकोळ वाढ झाली आहे. दर टिकून आहेत. लोकल (ठाणे, मुंबई) मागणीही आहे. तर दिल्ली, पंजाब, जम्मू काश्‍मीरसाठी बॉक्‍स पॅकिंगही सावदा येथे सुरू आहे. 
- सुधाकर चव्हाण, केळी व्यापाराचे जाणकार

रमजान महिन्यामुळे केळी दरात वाढ झाली. मला ऑनचे दर मिळाले असून, रावेरातील केळीमधील देशांतर्गत बाजारासंबंधीची उलाढाल वाढली आहे. 
- अतुल पाटील,  केळी उत्पादक, केऱ्हाळे (जि. जळगाव)

Web Title: jalgaon news Banana rates slightly improved