जेडीएसच्या आमदाराचे काँग्रेसला मतदान, म्हणाले - आय लव्ह इट

बंगळूरु : राज्यसभेच्या १६ जागांसाठी चार राज्यांमध्ये आज शुक्रवारी (ता.दहा) मतदान होत आहे. राजकीय पक्षांनी घोडेबाजार होऊ नये म्हणून आपापले आमदार हाॅटेल आणि रिसाॅर्टमध्ये ठेवले आहे. दुसरीकडे कर्नाटकात उघडपणे विरोधी मतदानाचा (Cross Voting) प्रकार समोर आला आहे. वास्तविक श्रीनिवास गौडा (K Srinivasa Gowda) आणि श्रीनिवास गुब्बी यांच्यासह कमीत-कमी दोन जनता दल (धर्मनिरपेक्ष) आमदारांनी शुक्रवारी कर्नाटकमध्ये चार जागांसाठी होत असलेल्या राज्यसभा निवडणुकीत (Rajya Sabha Election 2022) काँग्रेसला मतदान केले. राज्यात क्राॅस व्होटींग महत्त्वपूर्ण आहे. कारण एका जागेसाठी मुख्य विरोध पक्ष काँग्रेस आणि जद (स) दरम्यान एक जबरदस्त लढत पाहायला मिळत आहे. (Rajya Sabha Election Two JDS MLA Voted For Congress In Karnataka)

दोन्ही पक्षांनी भाजपला हरवण्याचा पण केला आहे. जद (स) आमदार श्रीनिवास गौडा जेव्हा विधानसभा परिसरातून बाहेर पडत होते, तेव्हा त्यांना विचारण्यात आले की त्यांनी कोणाला मतदान केले? यावर ते म्हणाले, मी काँग्रेसला (Congress Party) मतदान केले. जेव्हा त्यांना विचारले गेले की असे का केले? त्यावर गौडा म्हणाले, कारण आय लव्ह काँग्रेस (मला काँग्रेस आवडते). यापूर्वीच त्यांनी स्पष्ट केले, की ते एच.डी. कुमारस्वामींच्या नेतृत्वाखालील जद (एस) सोडून काँग्रेसमध्ये प्रवेश करणार आहेत. जद(स) चे अध्यक्ष एच.डी.कुमारस्वामी म्हणाले, की पक्षाचे ३२ पैकी दोन आमदारांनी विरोधात जाऊन काँग्रेसला मतदान केले.

आमच्यासारख्या धर्मनिरपेक्ष पक्षाचे समर्थन न करता काँग्रेसने भाजपला मजबूत केले आहे. आज संध्याकाळपर्यंत निवडणुकीचा निकाल येण्याची आशा आहे. निवडणुकीच्या एक दिवसापूर्वी, काँग्रेसचे विधानसभा नेते सिद्धारमैय्याने जदच्या (स) आमदारांना खुले पत्र लिहिले होते. त्यात त्यांनी काँग्रेसचे उमेदवार मन्सूर अली खानच्या बाजूने मतदान करण्याचे आवाहन केले. यात दोन्ही पक्षांच्या धर्मनिरपेक्ष विचारसरणीचा विजय होईल, असे म्हटले होते.