'गद्दारी'च्या आरोपामुळे देवेंद्र भुयार नाराज; शरद पवारांशी करणार चर्चा

राज्यसभेच्या निवडणुकीचा काल निकाल लागला. या निकालामध्ये भाजपाने दणदणीत विजय मिळवल्याचं समोर आलं. तर शिवसेनेचे संजय पवार यांना मात्र पराभवाचा सामना करावा लागला. संजय राऊतही थोडक्यात पराभवापासून बचावले. यानंतर संजय राऊतांनी अपक्ष आमदारांनी गद्दारी केल्याचं सांगत त्यांच्यावर आरोप केले. यामुळे नाराज झालेले अपक्ष आमदार देवेंद्र भुयार आज शरद पवारांची भेट घेणार आहे.

संजय राऊत यांनी गद्दारीचा आरोप केल्यानंतर देवेंद्र भुयारांनी हे आरोप फेटाळले होते. भुयार यांनी राऊतांच्या या आरोपांना प्रत्युत्तरही दिलं होतं. आपण सातत्याने महाविकास आघाडीच्या बाजूने असूनही, त्यांना मत देऊनही आपल्याला बदनामी सोसावी लागत आहे. त्यामुळे आपण महाविकास आघाडीचे कर्ते आणि राष्ट्रवादीचे अध्यक्ष शरद पवार यांची भेट घेणार असल्याचं भुयार यांनी सांगितलं.

मुख्यमंत्र्यांकडे आपली कामं होत नाहीत, मुख्यमंत्री वेळ देत नाहीत, अशी नाराजीही त्यांनी काही दिवसांपूर्वी व्यक्त केली होती. त्याबद्दलही या भेटीत चर्चा होणार आहे. तसंच संजय राऊतांच्या आरोपांबद्दल भुयार शरद पवारांशी बोलणार आहेत.