मालेगावात लुटारूंकडून धक्कादायक प्रकार; पोलिसांवर गोळीबार

मालेगाव (जि. नाशिक) : शहरात गुन्हेगारी कारवाया, चोरी, घरफोड्या, चैन स्नॅचिंग, लुटमार हे प्रकार वाढत असतानाच गुन्हेगार निर्ढावले आहेत. येथील यंत्रमाग कारखानदाराचे अपहरण करुन त्याला २८ हजार रुपयांना लुटणाऱ्या संशयितांना पकडण्यासाठी गेलेल्या स्थानिक गुन्हे शाखेच्या दोघा पोलिस कर्मचाऱ्यांवर सराईत गुन्हेगाराने गोळीबार केल्याचा धक्कादायक प्रकार घडला. सुदैवाने दोघे पोलिस कर्मचारी जखमी झाले नाहीत. शहरातील सरदारनगर भागात बुधवारी (ता. ९) रात्री हा प्रकार घडला.

पोलिसांवर रोखले गावठी पिस्तुल

दुचाकीवर जाणाऱ्या यंत्रमाग कारखानदार एजाज अहमद खुर्शीद अहमद (वय ५२, रा. नया इस्लामपुरा) यांना धारदार शस्त्राचा धाक दाखवून एटीएम केंद्रावर नेत जबरदस्तीने २५ हजार रुपये लुटल्याचा प्रकार मंगळवारी (ता. ८) रात्री साडेबाराच्या सुमारास साठफुटी रोडजवळ घडला होता. या प्रकरणी आयशानगर पोलिस ठाण्यात गुन्हा दाखल झाला. यात पोलिसांनी नदीम अहमद शकील अहमद (वय २२, रा. अबुबकर सिद्दीकीनगर) याला अटक केली. याच गुन्ह्यातील अन्य दोघे संशयित सरदार नगरात आल्याची माहिती पथकाला मिळाली. हवालदार गिरीश निकुंभ, पोलिस नाईक सुभाष चोपडा हे संशयितांना अटक करण्यासाठी सरदारनगरात गेले असता संशयित जमाल बिल्डर व सलमान (पूर्ण नाव माहित नाही) यांनी कंबरेला लावलेला गावठी कट्टा काढून पोलिसांवर गावठी पिस्तुल रोखले. जमालने हवेत दोन राऊंड फायर केले. यात पोलिसांनी पकडलेला एक संशयित फरार झाला.

पोलिसांवरील हल्ल्याची माहिती मिळताच जिल्हा पोलिस अधिक्षक सचिन पाटील, अपर पोलिस अधीक्षक चंद्रकांत खांडवी, उपअधिक्षक लता दोंदे पोलिस निरीक्षक पारीख यांनी व सहकाऱ्यांनी घटनास्थळी भेट देत संशयितांचा सरदारनगर झोपडपट्टीत शोध घेतला. श्री. निकुंभ यांच्या तक्रारीवरुन आझादनगर पोलिस ठाण्यात दोघांविरुद्ध खुनाचा प्रयत्न, सरकारी कामात अडथळा, हल्ला केल्याचा गुन्हा दाखल करण्यात आला आहे.