Ahmednagar : कोयता घेण्यासाठी ट्रॅक्टरवर चढली अन् कुट्टी मशिनमध्ये साडी अडकून झाला मृत्यू, थरारक घटना

खर्डा - जामखेड तालुक्यातील ऐतिहासिक खर्डा येथे रामचंद्र रामकिसन इंगोले यांच्या शेतातील गट नंबर ७६ मध्ये कुट्टी मशिन चालू असताना खर्डा येथील लक्ष्मी विजय गोलेकर यांचा अडकून मृत्यू झाला. गोलेकर या कोयता घेण्यासाठी ट्रॅक्टरवर चढली व कोयता घेऊन खाली उतरत असताना त्यांची साडी ट्रॅक्टर व कुट्टी मशिन जोडण्याच्या शाफ्टमध्ये अडकली. त्यामुळे त्या गोल फिरून गंभीर जखमी झाल्या.

त्यांना तातडीने ग्रामीण रुग्णालयात नेले असता, तेथील डॉक्टरांनी त्यांना मृत घोषित केले. अंबादास इंगोले यांच्या खबरीवरून खर्डा पोलिस ठाण्यात अकस्मात मृत्यूची नोंद करण्यात आली आहे. जामखेड पोलिस स्टेशनचे पोलिस निरीक्षक महेश पाटील, खर्डा पोलिस कॉन्स्टेबल संभाजी शेंडे यांनी भेट दिली.