लंके कोरोना केसरी! हिंद केसरींनी दिली चांदीची गदा नि एक लाख

पारनेर (अहमदनगर) ः राज्यात अन् देशातही कोरोनाच्या महामारीने थैमान घातले आहे. या महामारीत अनेकांचे जीव जात आहेत. अशा भयानक कोरोना साथीच्या आजारातही स्वतःच्या जीवावर उदार होत आमदार नीलेश लंके फाईट करीत आहेत. त्यांनी भाळवणी येथे एक हजार शंभर बेडचे कोविड सेंटर उभारून तेथे ते रात्रं-दिवस सेवा देत आहेत. त्यांच्या या कार्याचा गौरव सुरोली (कराड) येथील हिंद केसरी फाउंडेशनच्या वतीने करण्यात आला. लंके यांना हिंद केसरी संतोष वेताळ (आबा) यांच्या हस्ते अडीच किलो चांदीची गदा, एक लाख रुपयांचा धनादेश, सन्मानपत्र देऊन कोरोना केसरी म्हणून त्यांचा गौरव करण्यात आला. (Corona Kesari Award to MLA Nilesh Lanke)

कोरोनाच्या अतिशय कठीण प्रसंगात जनतेला आधार देण्यासाठी व कोरोना रूग्णांची सेवा करण्यासाठी भाळवणी येथे कोविड सेंटर उभे केले आहे. त्यांच्या या कामाची राज्यात चर्चा आहे. त्यांचे पक्षाचे अध्यक्ष शरद पवार, राज्याचे उपमुख्यमंत्री अजित पवार, खासदार सुप्रिया सुळे पक्षाचे प्रदेशाध्यक्ष जयंत पाटील आदींनी त्यांच्या कामाची वाहवा केली आहे.

आमदार लंके यांना कोरोना त्यांच्या कामाबद्दल कोरोना केसरी किताब देऊन त्यांना सन्मानित करण्यात आले आहे. लंके यांचा अडीच किलो चांदीची गदा व कोरोना केसरी सन्मानपत्र व एक लाख रुपयांचा धनादेश देऊन गौरविण्यात आले. कोरोनाच्या जागतिक महामारीच्या काळामध्ये लंके यांचा सामाजिक काम अतुलनीय आहे. लंके यांनी एकाच वेळी लोकप्रतिनिधी आणि समाजसेवकाची भूमिका अतिशय चांगल्या प्रकारे निभावली आहे. त्यांची ही लोकसेवा निश्चितच इतरांच्या दृष्टीने प्रेणादायी आहे.

राज्यातील एक उत्तम लोकप्रतिनिधी म्हणून त्यांच्याकडे जनता आदराने पाहत आहे. लंके हे स्वतः मैदानात उतरून आपल्या मतदारसंघातील जनतेसाठी कोरोनाशी दोन हात करीत आहेत. या पुरस्कार प्रदान करताना नवनाथ पाटील (भाऊ), सुरोलीचे सरपंच दत्तात्रय वेताळ, समाजसेवक निसार मुल्ला, पैलवान सोनू मदने आदी उपस्थित होते.

कोरोना महामारीच्या काळात कोरोना रूग्णांसाठी राष्ट्रवादी काँग्रेसचे आमदार नीलेश लंके यांचे आदर्श काम आहे. त्यांचे काम राज्याला दिशादर्शक आहे. त्यांनी कोरोना बरोबरची कुस्ती चीतपट करण्याचे काम केले आहे. म्हणून सुरोली येथील हिंदकेसरी फाउंडेशनच्या वतीने त्यांना कोरोना केसरी हा किताब देण्यात आला.(Corona Kesari Award to MLA Nilesh Lanke)