लसीकरणाने ओलांडला २१ लाखांचा टप्पा!

अकोला - कोरोनाची तिसरी लाट ओसरली असली तरी चौथ्या लाटेचा धोका कायम आहे. त्यामुळे कोरोना प्रतिबंधात्मक लसीकरणाला आरोग्य विभाग प्राथमिकता देत आहे. परंतु नागरिक मात्र लसीकरणाकडे काणाडोळा करत आहेत. असे असले तरी लसीकरणाने २१ लाखांचा टप्पा ओलांडला असून लसीकरणाने आणखी एक विक्रम केला आहे. त्यामध्ये पहिला डोस घेणाऱ्यांची संख्या १२ लाख २३ हजार ५०६, दुसरा डोस घेणाऱ्यांची संख्या ८ लाख ५१ हजार ९७१ तर प्रिकॉशन डोस घेणाऱ्यांची संख्या २५ हजार २७८ आहे.

देशभरात १६ जानेवारी २०२१ रोजी कोविड-१९ विरोधात लसीकरण मोहीम सुरू करण्यात आली. लसीकरणाच्या पहिल्या टप्प्यात कोरोना योद्धा व वैद्यकीय कर्मचाऱ्यांचे लसीकरण करण्यात आले. त्यानंतर १ मार्च २०२१ पासून ६० वर्षांवरील ज्येष्ठ नागरिक व दुर्धर आजारग्रस्तांचे लसीकरण करण्यात आले. १ एप्रिल २०२१ पासून ४५ ते ५९ वयोगटातील नागरिकांसह दुर्धर आजारग्रस्त व १ मे पासून १८ वर्षावरील नागरिकांसाठी लसीकरण मोहीम खुली करण्यात आली. त्यामुळे या वयोगटासाठी मोहीम सुरू झाल्यानंतर अधिक प्रमाणात नागरिक कोरोनाची लस घेण्यासाठी लसीकरण केंद्रांवर पोहचले.

परंतु त्यानंतर सुद्धा जिल्ह्यातील बहुतांश नागरिकांनी कोरोनाची लस न घेतल्याने आरोग्य विभागामार्फत कोरोना प्रतिबंधात्मक लसीकरण अधिक गतीने करण्याचे अभियान हाती घेतले. त्यानुसार १४ ऑक्टोबर २०२१ पर्यंत जिल्ह्यात कवच कुंडल अभियान राबवण्यात आले. त्यानंतर ‘हर घर दस्तक’ मोहीम राबवण्यात आली. त्यामुळे लसीकरणाची व्याप्ती वाढली. अधिकाधिक नागरिकांनी लस घ्यावी यासाठी १५ वर्षावरील युवकांना सुद्धा कोरोनाची लस देण्यात येत आहे. त्यामुळे लस घेणाऱ्यांची संख्या वाढली आहे. परंतु अद्यापही प्रिकॉशन डोस घेणाऱ्यांची संख्या मात्र कमीच आहे.

कोव्हिशील्ड लसींचा तुटवडा

जिल्ह्यात लसीकरण सुरू झाल्यापासून लसींचा कमी अधिक प्रमाणात तुटवडा जाणवत आहे. दरम्यान सध्या जिल्ह्यात कोव्हिशील्डचे दोन हजार, कोव्हॅक्सीनचे १५ हजार आणि कोर्बेव्हॅक्सचे ५४ हजार डोस शिल्लक आहेत. त्यापैकी कोव्हिशील्डचे सर्वात कमी दोन हजार डोसच बाकी असल्याने सदर डोसचा साठा केवळ ४ दिवसच पुरणार आहे. त्यामुळे आरोग्य विभागाने सदर लसींचे ७ हजार डोस मिळावे, अशी मागणी वरिष्ठ स्तरावर केली आहे.

लसीकरणात पुरूष पुढे

कोरोना प्रतिबंधात्मक लसीकरणात पुरूष हे महिलांच्या तुलनेत पुढे आहेत. जिल्ह्यातील १० लाख ५२ हजार २४३ पुरुषांची कोरोनाचे डोस घेतले असून १० लाख २२ हजार ८४६ महिलांनी कोरोनाची लस घेतली आहे. त्यामुळे महिलांच्या तुलनेत पुरषांची संख्या अधिक असल्याचे दिसून येते.

अशी आहे लस घेणाऱ्यांची स्थिती

एकूण २१ लाख ७५५

पहिला डोस १२ लाख २३ हजार ५०६

दुसरा डोस ८ लाख ५१ हजार ९७१

प्रिकॉशन डोस २५ हजार २७८