लाखो रुपये खर्च करून पदरात काहीच नाही

कृष्णा फंदाट
Tuesday, 27 October 2020

तालुक्यातील जमीन सर्वच पिकांसाठी पोषक असल्याने केळीचे उत्पादन मोठ्या प्रमाणात घेतले जाते. पण केळीचे दर घसरल्याने केळी उत्पादक शेतकरी अडचणीत सापडले आहेत.

तेल्हारा (जि.अकोला) :  तालुक्यातील जमीन सर्वच पिकांसाठी पोषक असल्याने केळीचे उत्पादन मोठ्या प्रमाणात घेतले जाते. पण केळीचे दर घसरल्याने केळी उत्पादक शेतकरी अडचणीत सापडले आहेत.

यावर्षी सुरुवातीपासूनच पावसाने दमदार हजेरी लावली. त्यामुळे बागायती पिकासह जिरायती हंगाम चांगलाच बहरला. परंतु ऐन कापणीच्या वेळेस अतिपावसाने मूग, उडीद आदी पिके हातची गेली. नंतर परतीच्या पावसाने सोयाबीन, ज्वारी, कापूस, तीळ आधी पिकांना मोठा फटका बसला. त्यापासून फळ बागाही सुटल्या नाहीत.

तेल्हारा तालुक्यातील बेलखेड, माळेगाव बाजार, दानापूर, हिगनी, हिवरखेड, खंडाळा, सौंदळा आदी गावांमध्ये केळी उत्पादक शेतकरी मोठ्या प्रमाणात आहेत. त्यांनी आपल्या शेतात केळीची लागवड मोठ्या प्रमाणात केली होती.

रात्रंदिवस एक करून लाखो रुपये खर्च करून केळीचे पीक लहानाचे मोठी केली; मात्र यावर्षी केळीचे घड कापणीला सुरुवात झाली तेव्हा केळीच्या दरात मोठ्या प्रमाणात घसरण झाली. मार्च महिन्यात कोरोनाचा प्रभाव वाढत असल्याने राज्यासह संपूर्ण देशात लॉकडाउन घोषित करण्यात आला.

त्यामुळे केळीला कोणी घेवालच नव्हता. बाजारपेठेत केळीला केवळ दोनशे ते अडीचशे रुपये क्विंटलचा भाव होता. मधल्या काळात केळीच्या भावामध्ये थोडा सुधार झाला; मात्र पुन्हा केळीचे दर घसरले. आज साडेतीनशे ते साडे चारशे रुपये क्विंटल प्रमाणे केळीला मागणी होत आहे. या भावात केलेल्या खर्चाचा विचार करता विकणे परवडत नाही.

उत्सवातील मागणीही घटली
गणपती, देवी या सणासुदीच्या काळात केळीला बऱ्यापैकी दर मिळतो; पण यावर्षी तसे घडले नाही. तेल्हारा तालुक्यातून प्रामुख्याने गुजरात, मध्यप्रदेश व अन्य प्रांतात केळी पाठवली जातात. पण परतीच्या पावसाने कापणीस आलेली केळी शेतामध्ये तशीच आहे. कटनी होत नाही व बाजारपेठेमध्ये देखील भाव नाहीत. काहींच्या केळीला घडे नाहीत. त्यावर रोगराई वाढली. या सर्व कारणांमुळे केळी उत्पादक शेतकरी अडचणीत सापडला आहे.

यावर्षी केळीला भाव नसल्याने केळी उत्पादक शेतकऱ्यांना एकरी एक ते दीड लाखांचा तोटा सहन करावा लागत आहे. शासनाने याबाबत फळ उत्पादक शेतकऱ्यांना मोठे पॅकेज जाहीर करावे व शेतकऱ्यांना दिलासा द्यावा.
- रमेश खारोडे, उत्पादक शेतकरी, तळेगाव बाजार

(संपादन - विवेक मेतकर)


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Akola News: There is nothing in the position by spending lakhs of rupees