भडगाव परिसरात वादळीवार्‍यासह गारपीट

भडगाव (बुलडाणा) : परिसरातील चांडोळ, इरला, ढंगारपूर, सावळी, रुईखेड, मोहोज, भडगाव, पिंपळगाव (सराई), ढासाळवाडी व घाटनांद्रा या गावांमध्ये वादळी वार्‍यासह पाऊस व तुरळक ते मध्यम स्वरूपाची साधारणपणे बोरा एवढ्या आकाराची गारपीट झाली.

वादळी वार्‍यात पपई फळाचा मळा उद्ध्वस्त
 
वादळी वार्‍यामुळे झाडे उन्मळून व फांद्या तुटून विद्युत तारांवर पडल्यामुळे वीजपुरवठा खंडित झाला. त्यामुळे नागरिकांचे मोठ्या प्रमाणात हाल झाले. बहुतांशी रब्बी पीक काढले गेले असल्याने जास्त नुकसान झाले नाही. मात्र शेतात उभ्या असलेल्या कांदा पिकाचे अंशतः नुकसान झाले. यामुळे शेतकरी वर्ग हवालदिल झाला आहे.

धामणगाव बढे परिसरात पिकांचे नुकसान

कोरोना संकटामुळे आधीच जीव मेटाकुटीस आला असून अनेकांचे आर्थिक कंबरडे मोडले आहे. त्यातच आता हा वादळी वारा व गारपीटसह पडलेल्या पावसामुळे भाजीपाला व कांदा पिकाचे उत्पादन घेणार्‍या शेतकर्‍यांचे नुकसान झाले आहे. त्यामुळे हातातोंडाशी आलेला घास निसर्गाच्या अवकृपेने हिरावून घेतला आहे. त्यामुळे कांदा व भाजीपाला उत्पादकवर्ग हवालदिल झाला आहे.