Akola Crime : ऑनलाईन लाॅटरी जुगारावर पोलिसांची कारवाई; दोघांना अटक, ६३ हजार ४७० रुपयांचा मुद्देमाल जप्त

Akola News : ऑनलाईन लॉटरी जुगार खेळणाऱ्या दोन आरोपींना अटक करुन पोलिसांनी आरोपींकडून ६३ हजार ४७० रुपयांचा मुद्देमाल जप्त केला. सदर कारवाई उपविभागीय पोलिस अधिकारी यांच्या पथकाने केली.

खदान पोलिस स्टेशन हद्दीतील सिंधी कॅम्प येथील आशा मुव्हिज गिफ्ट गॅलरीच्या बाजुला असलेल्या दुकानात अवैधरित्या विना परवाना राजश्री लोटो ऑनलाईन लाॅटरीचा जुगार खेळल्या जात आहे, अशी माहिती उपविभागीय पोलिस अधिकारी यांच्या पथकाला मिळाली. त्यामुळे पथकाने ६ मार्च रोजी छापा मारुन आरोपी विजयकुमार पंजुमल उर्फ होलाराम रोहाडा (वय ५९, रा. कच्ची खोली, सिंधी कॅम्प),

अश्विन काशीनाथ सरदार (वय ३३, रा. कैलास टेकडी खदान) यांना ताब्यात घेतले. आरोपींना लॉटरीबाबत कागदपत्रांची मागणी केली असता त्यांच्याजवळ कुठलेही कागदपत्र नसल्याने दोन्ही आरोपींकडून आणि घटनास्थळावरून एकूण ६३ हजार ४७0 रुपयांचा मुद्देमाल जप्त करण्यात आला.

जप्त माल व आरोपींना खदान पोलिसांच्या ताब्यात देण्यात आले आहे. ही कारवाई उपविभागीय पोलिस अधिकारी शहर विभाग सतीश कुलकर्णी यांच्या पथकातील पोलिस कर्मचाऱ्यांनी केली.