मंठा : तालुक्यात यंदा उन्हाळी सोयाबीनचे पीक बहरात आहे. सध्या शेतकऱ्यांची पिकांस पाणी देण्याची लगबग सुरू आहे. यंदा सोयाबीनचे चांगले उत्पादन मिळण्याची शेतकऱ्यांना अपेक्षा आहे.सोयाबीनच्या पिकाकरिता खर्च व मेहनत कमी लागत असल्याने तालुक्यात खरिपाच्या पेरणीत कपाशीचे क्षेत्र घटून सोयाबीन पिकाचे क्षेत्र वाढले आहे. या वर्षी खरिपाच्या पिकात सर्वाधिक ३२ हजार ८९६ हेक्टर क्षेत्रात सोयाबीनची पेरणी झाली होती.

पावसाची अनियमितता व अतिवृष्टीमुळे सोयाबीन पिकाचे खूप मोठ्या प्रमाणात नुकसान झाले होते. तरी देखील थोड्याफार प्रमाणात सोयाबीनचे पिक शेतकऱ्याच्या पदरात पडले तसेच सोयाबीनला बाजारात भाव देखील चांगला मिळत आहे.यावर्षी पाऊस भरपूर पडल्याने विहिरीच्या पाण्याची पातळीत वाढ झाली आहे. ठिकठिकाणी पाणीसाठ्यात वाढ झाली आहे. याबरोबरच ठिबक सिंचन, तुषार सिंचन यामुळे पाण्याची बचत होऊन पिकाच्या मोठ्या क्षेत्रात पाणी देता येते. तसेच अनेक शेतकऱ्याकडे ठिबक व तुषार सिंचन असल्याने जास्तीचा खर्च करण्याची गरज नाही. त्यामुळे यावर्षी रब्बीच्या पिकात सोयाबीन पिकाची वाढ झाली आहे. अनेक शेतकऱ्यांनी खरिपात सोयाबीनचे पिक घेतले होते.

त्याच शेतात नंतर उन्हाळी सोयाबीन पेरणी अनेक शेतकऱ्यांनी केली आहे. तालुक्यात उन्हाळी सोयाबीनचे पिक बहारदार आहे. शेतकरी दिवस-रात्र उन्हाळी सोयाबीन पिकाची वन्यप्राण्यांपासून संरक्षणासाठी सज्ज आहेत. शिवाय सोयाबीन पिकास पाणी देण्याची लगबग करीत आहे. उन्हाळी सोयाबीन बहारदार असून भरपूर उत्पादन मिळेल अशी शेतकऱ्यांना अपेक्षा आहे. खरिपाच्या पेरणीच्या वेळी सोयाबीनच्या बियाण्याचा तुटवडा निर्माण झाला होता. अनेक शेतकऱ्याना इतर जिल्ह्यातून जास्त भावाने सोयाबीनचे बियाणे खरेदी करावे लागले होते. आता उन्हाळी सोयाबीन पिकातून चांगले दर्जेदार बियाणे मिळेल व सोयाबीन विक्रीतून आर्थिक हातभार देखील लागेल, अशी शेतकऱ्यांना अपेक्षा आहे.