Local Made Guns Sale in Ahmednagar: गावठी कट्टे व जिवंत काडतुसांची खुलेआम विक्री करणाऱ्या दोन गुन्हेगारांना स्थानिक गुन्हे शाखेने बेड्या ठोकल्या. कारवाईत ६२ हजार रूपये किमतीचे दोन गावठी कट्टे व चार जिवंत काडतुसे जप्त केली. छत्रपती संभाजीनगर रस्त्यावरील शेंडी बायपास व नागरदेवळे शिवारात एलसीबीने कारवाई केली.

गावठी कट्टा व जिवंत काडतुसे विक्री करण्यासाठी काही जण शेंडी व नागरदेवळे येथे येणार असल्याची माहिती पोलिस निरीक्षक दिनेश आहेर यांना मिळाली. या माहितीच्या आधारे एलसीबीच्या पथकाने दोन्ही ठिकाणी सापळा लावला. शेंडी बायपास परिसरातून पोलिसांनी विकास सुधाकर सरोदे (वय २३, रा. गुंजाळे, ता. राहुरी, जि. अहमदनगर) याला ताब्यात घेतले.

त्याच्याकडून एक गावठी कट्टा व दोन काडतुसे जप्त केली. विकास सरोदे याचा साथीदार लखन सुधाकर सरोदे पळून गेला. दुसरी कारवाई नागरदेवळे शिवारातील वारूळवाडी रस्त्यावर करण्यात आली. ठकन ऊर्फ नितीन भाऊसाहेब आल्हाट (वय ३३, रा. मोरे चिंचोरा, ता. नेवासा) याला ताब्यात घेतले. आल्हाटचा साथीदार भैया शेख हा घटनास्थळावरून पळून गेला. (Latest Marathi News)

आल्हाट सराईत गुन्हेगार

ठकन आल्हाट हा सराईत गुन्हेगारआहे. अहमदनगर व पुणे जिल्ह्यात दरोडा, खुनाचा प्रयत्न, अत्याचार, जबरी चोरी, अवैध शस्त्रे बाळगणे, दुखापत असे ९ गुन्हे दाखल आहेत.