अहमदनगर - जिल्ह्यात आजअखेर ८२६ जनावरे बाधित आहेत. गेल्या काही दिवसांपासून लागण झालेल्या जनावरांची संख्या वाढत होती, मात्र लसीकरणामुळे साथ काही प्रमाणात आटोक्यात आली आहे. पाऊस नसल्याने कीटकांचे प्रमाण कमी झाले होते. आता पुन्हा पावसाने हजेरी लावल्याने साथ वाढण्याचा धोका आहे.

बाधितांचा आकडा वाढू नये म्हणून जिल्हा प्रशासनाने जनावरांचे सर्व बाजार बंद ठेवले आहेत. गेल्या वर्षी लम्पीने राज्यात कहर केला होता. त्यात नगर जिल्हा आघाडीवर होता. जनावरांचा मृत्यूदरही वाढला होता. सर्व यंत्रणा कामाला लागल्याने चार महिन्यांनंतर ही साथ आटोक्यात आली. देशी आणि दुधाळ जनावरांनाच लम्पीची लागण होत होती.

वर्षअखेर ५० हजार जनावरे बाधित झाली होती. ही पार्श्वभूमी पाहता, प्रशासनाने जिल्ह्यातील सर्व १४ लाख जनावरांचे लसीकरण केले. गेल्या वर्षी दूधउत्पादक शेतकऱ्यांना मोठा आर्थिक फटका बसला होता. कर्जत, जामखेड, श्रीगोंदे आणि संगमनेर तालुक्यांत लम्पीने कहर केला होता. संगमनेर तालुक्यात सर्वाधिक दुधाळ जनावरे आहेत. त्यातही गायींची संख्या मोठ्या प्रमाणावर आहे.

यंदा जुलै २०२३ पासून लम्पीचा पुन्हा शिरकाव झाला. त्या पार्श्वभूमीवर पशुसंवर्धन विभागाने तातडीने उपाययोजना केल्या. आजअखेर ८२६ जनावरे बाधित आहेत. मागील वर्षी लागण झालेल्या तालुक्यांत या वर्षी बाधित जनावरांची संख्या कमी आहे. शेवगाव, राहुरी, नेवासे, पाथर्डीत यंदा बाधित जनावरांचे आकडे मोठे आहेत. गेल्या वर्षी ४ हजार जनावरे दगावली होती. यंदा हा आकडा २६७ आहे.

शेतकऱ्यांना आवाहन

पाऊस झाल्याने कीटकांचे प्रमाण वाढते. त्यापासून प्रादुर्भावाची शक्यता बळावते. एक कीटक दिवसभरात साधारण तीन किलोमीटर प्रवास करतो. त्यामुळे पाच किलोमीटरच्या परिघात शासनामार्फत उपाययोजना केल्या जातात. साथ आटोक्यात आली असली तरी आगामी काळात काळजी घ्यावी, असे आवाहन पशुसंवर्धनचे सहायक उपायुक्त सुनील तुंबारे यांनी शेतकऱ्यांना केले आहे.