राहाता : मागील पंधरा वर्षांत माजी महसूलमंत्र्यांनी केली नाहीत, एवढी कामे पालकमंत्री राधाकृष्ण विखे यांनी काही महिन्‍यांतच करुन दाखविली. यामागे त्‍यांची समाजाला न्‍याय देण्‍याचीच भूमिका राहीली. आजी-माजी महसूलमंत्र्यांच्‍या कामाची तुलना आता समाजातील प्रत्येकजण करू लागल्याने शेजारच्‍यांना त्याचे दु:ख होत असल्याची टीका खासदार डॉ. सुजय विखे पाटील यांनी केली.

राहाता बाजार समितीच्या निवडणूक प्रचारानिमित्ताने साकुरी गटाची बैठक आयोजित करण्यात आली होती. त्याप्रसंगी ते बोलत होते. ‘गणेश’चे अध्यक्ष मुकुंदराव सदाफळ, संचालक अ‍ॅड. रघुनाथ बोठे, संचालक विजयराव गोर्डे, बाजार समितीचे माजी सभापती भाऊसाहेब जेजूरकर, भाजपचे शिवाजीराव गोंदकर, अभय शेळके, साहेबराव निधाने यांच्यासह ग्रामपंचायत सदस्य, संचालक उपस्थित होते.

खासदार विखे म्हणाले की, मंत्रिपद असो अथवा नसो समाजासाठी काम करण्‍याची मंत्री विखे यांची भूमिका कायम आहे. मात्र काही जण तालुक्‍यात येऊन येथील सहकारी संस्‍थांना दृष्‍ट लावण्‍याचे काम करीत आहेत. आम्‍ही वाळूतस्कारांना पोसत नाही. दहा ठेकेदार कार्यकर्त्यांना सांभाळण्यापेक्षा सर्वसामान्यांसाठी सहाशे रुपये ब्रासने वाळू उपलब्‍ध करुन माफियांना मंत्री विखे यांनी हद्दपार केले आहे.

पशुसंवर्धन विभागाच्या वतीने खडकेवाके येथे उभारण्‍यात येणाऱ्या १० कोटींच्या प्रकल्पास मंजुरी मिळाली आहे. या प्रकल्‍पात शेळ्या, मेंढ्यांचे लोकर, ब्रिडिंग, मांस निर्यात, उपपदार्थ निर्मिती होणार आहे. येत्या १५ दिवसांत त्याचे भूमिपूजन होऊन तरुणांना नोकरी मिळणार आहे. याप्रसंगी सदाफळ, अ‍ॅड. बोठे, माजी नगराध्यक्ष साहेबराव निधाने यांची भाषणे झाली.