श्रीगोंदे - जमिनीच्या वादातून शेतकऱ्यावर गोळीबार प्रकरणातील मुख्य आरोपी जयदीप सुरुंकर हा अद्याप फरार आहे. त्याचा सहकारी सचिन ऊर्फ चिंग्या सोपान भागवत (वय २५) याला अटक करण्यात आली आहे. न्यायालयाने त्याला पाच दिवसांची पोलिस कोठडी दिली.

जमीन व्यवहारातून झालेल्या वादातून आरोपी सुरुंकर याने संतोष ऊर्फ लाला गायकवाड या शेतकऱ्यावर थेट गोळीबार केला. हातातील पिस्तुलातून सहा गोळ्या खाली केल्या. हॉटेलमधून बाहेर पळाल्यानंतर पाठलाग करून गोळ्या झाडल्या गेल्या. या प्रकरणाचा तपास बेलवंडीचे उपनिरीक्षक मोहन गाजरे यांनी बारकाईने केला आहे. मुख्य आरोपी सुरुंकर याच्यासोबत असलेल्या चिंग्या भागवत याला आज अटक करण्यात आली.

त्याला पोलिसांनी निरोप दिल्यावर तो पळून गेल्याने पोलिसांचा संशय बळावला आणि त्यातील तपासात त्याचा गुन्ह्यात संबंध असल्याचा पोलिसांचा दावा आहे. त्याला अटक केल्यानंतर न्यायालयाने पाच दिवसांची पोलिस कोठडी दिली. या प्रकरणात अजून काही आरोपी वाढण्याची शक्यता व्यक्त होत आहे.

हल्ला पूर्वनियोजित?

मुख्य आरोपी सुरुंकर याची घरची आर्थिक स्थिती हलाखीची आहे, तरीही त्याच्याकडे पिस्तूल कोठून आले याचा शोध घेतला जात आहे. हा हल्ला पूर्वनियोजित होता का? याचाही शोध पोलिस घेत असल्याची माहिती आहे.

मोबाईल घरी; लोकेशन मिळेना

आरोपी जयदीप सुरुंकर याने हा हल्ला सराईतपणे करीत गोळ्या झाडल्यानंतर शांतपणे घटनास्थळावररून पायी चालत निघून गेला. जाताना पोलिसांना चकवा देण्यासाठी मोबाईल घरी महिलांकडे दिला. त्यामुळे त्याचे लोकेशन मिळत नाही.