पारनेर (जि. अहमदनगर) : तालुक्यात सध्या विजेचा खेळखंडोबा सुरू आहे. त्यामुळे शेतकरी त्रासले आहेत. सध्या शेतीपंपांसाठी फक्त सहा तास वीज दिली जाते, तीही पूर्ण दाबाने मिळत नाही. अनेकदा ती गायबही होते. आम्हाला किमान आठ तास तरी वीज मिळावी, अशी मागणी शेतकऱ्यांमधून होत आहे.

बिबट्यांच्या भीतीने रात्री पाणी देता येईना

यंदा पाऊस काही भागात समाधानकारक, तर काही भागात कमी झाला आहे. मात्र, सगळीकडे कमी-अधिक प्रमाणात विहिरी- तलावांना पाणी आहे. पिकेही चांगली आहेत. मात्र, विजेअभावी ती सुकू लागली आहेत. विहिरी- तलावांत पाणी आहे, मात्र केवळ विजेअभावी पिकांना देता येत नाही. शेतकऱ्यांना वीजवितरण कंपनी २४ तासांचे बिल देते, मात्र प्रत्यक्षात शेतकऱ्यांना फक्त सहाच तास वीज मिळत असल्याने नाराजी आहे.
तालुक्यात अनेक भागांत रात्रीच्या वेळी बिबट्याचे दर्शन होते. महावितरण मात्र आठ दिवस दिवसा, तर आठ दिवस रात्री वीजपुरवठा करते. त्यामुळे रात्रीच्या वेळी वीज मिळत असूनही अनेक गावांत शेतकऱ्यांना पिकांना पाणी देण्यासाठी जाता येत नाही.

ऊर्जा राज्यमंत्री जिल्ह्यातील असल्याने, किमान नगर जिल्ह्यात वीजपुरवठा सुरळीत होईल, अशी किमान अपेक्षा जिल्ह्यातील जनतेची आहे. मात्र, ऐन सणासुदीच्या व पिकांना पाणी देण्याच्या वेळीच शेतीपंपांसह घरगुती विजेचा तालुक्यात खेळखंडोबा सुरू आहे.

''शेतकऱ्यांना पूर्ण दाबाने, तसेच किमान आठ तास वीज व तीही दिवसा दिली नाही, तर आम्ही एक रुपयाही वीजबिल भरणार नाही. दिवाळीनंतर वीजवितरण कंपनी वीजबिल वसुली सुरू करणार आहे. ती आम्हाला मान्य नाही.'' - अनिल देठे, शेतकरी संघटना