जामखेड : अवकाळी पावसामुळे शेतकऱ्यांच्या पिकांचे नुकसान झाले आहे. त्यातच दि १७ एप्रिल रोजी सायंकाळी जामखेड तालुक्यात झालेल्या अवकाळी पावसामुळे चार जनावरांचा वीज पडून मृत्यू झाला आहे. याबाबत तहसीलदार गणेश माळी यांनी पंचनामे करण्याचे आदेश दिले आहेत.

बुधवारी (ता.१७) झालेल्या वादळी वा-यासह अवकाळी पावसामुळे शेतकऱ्यांच्या पिकांचे मोठ्या प्रमाणात नुकसान झाले आहे. जामखेड तालुक्यातील अनेक भागात बुधवारी अवकाळी पावसाने हजेरी लावली. दरम्यान, वीज पडून जनावरे मृत्यू होण्याच्या घटना तालुक्यातील चार ठिकाणी झाल्या. दोन दिवसांपूर्वी साकत येथे पांडुरंग वराट यांचा बैल वीज पडून मृत्यू झाला होता.

तर बुधवारी (ता.१७) झालेल्या वादळी वाऱ्यामुळे तालुक्यातील कुसडगाव येथील बिभीषण रामचंद्र भोरे यांची गाय, जवळके येथील अंकुश वाळुंजकर यांची गाय, दादासाहेब हाडोळे यांचा बैल तर भुतवडा येथील उद्धव पांडुरंग डोके यांचे एक वासरू वीज पडून मृत्यू पावले आहेत.

दोन गायी, एक बैल व एक वासरासह फळ पिकांचेही काही भागात नुकसान झाले आहे. विजेच्या कडकडाटांमुळे जामखेड शहरातील वीज पाच ते सहा तासांपासून बंद होती.