अकोले - म्हाळादेवी (ता. अकोले) येथे गुरुवारी दुपारी प्रवरा नदीपात्रात कपडे धुण्यासाठी गेलेल्या मायलेकींचा पाण्यात बुडून मृत्यू झाल्याची दुर्दैवी घटना घडली.

पूनम किरण भोसले (वय २७, रा. कोल्हार खुर्द), मुलगी आर्या किरण भोसले (वय ३) अशी मृतांची नावे आहेत. पूनम भोसले या वडील नारायण महादू संगारे यांच्याकडे म्हाळादेवीला आल्या होत्या. दुपारी पूनम व मुलगी आर्या कपडे धुण्यासाठी स्मशानभूमीलगत असलेल्या धोबी घाटावर गेल्या होत्या. संगारे हे अकोले येथे आठवडे बाजारात गेले होते. ते दुपारी साडेतीन वाजता घरी आल्यानंतर लेक व नात घरात न दिसल्याने त्यांनी शोधाशोध सुरू केली.

या वेळी धोबी घाटावर त्यांना कपडे व चपला दिसल्याने, नातेवाईक व ग्रामस्थांनी परिसराची पाहणी केली. या वेळी पूनम यांचा मृतदेह आढळून आला. नातीचा रात्री उशिरापर्यंत शोध घेतला असता ती मिळून आली नाही. आज शुक्रवारी सकाळी आर्याचा मृतदेह पाण्यात आढळला. शविच्छेदन करून मृतांवर अंत्यसंस्कार करण्यात आले. याप्रकरणी अकोले पोलिस ठाण्यात अकस्मात मृत्यूची नोंद करण्यात आली. पुढील तपास सहायक पोलिस निरीक्षक मिथुन घुगे यांच्या मार्गदर्शनाखाली सुरू आहे.