राहुरी - तालुक्यातील कात्रड येथे पतीने मंगळवारी (ता.१५) रात्री अकरा वाजता राहात्या घरात लोखंडी रॉड डोक्यात घालून पत्नी व सासूची हत्या केली. त्यानंतर फरार झालेल्या आरोपीचा मृतदेह आज धनगरवाडी (ता. नगर) येथे झाडाला गळफास घेतलेल्या अवस्थेत आढळला. या घटनेने तालुक्यात खळबळ उडाली आहे.

सागर सुरेश साबळे (वय ३०, रा. कात्रड) असे गळफास घेतलेल्या आरोपीचे नाव आहे. नूतन सागर साबळे (वय २३) व सुरेखा दिलीप दांगट (वय ४५, दोघीही रा. कात्रड) असे मृत पत्नी व सासूचे नाव आहे. आरोपी सागर घरजावई होता.

नगर येथे औद्योगिक वसाहतीत काम करीत होता. पत्नी माहेरी राहत असल्याने पती-पत्नीमध्ये वाद होता. तो रात्री उशिरा घरी आल्यावर वाद विकोपाला गेला. रात्री अकरा वाजता आरोपीने रागाच्या भरात पत्नी व सासूच्या डोक्यात लोखंडी रॉडचे प्रहार केले.

रक्ताच्या थारोळ्यात पडलेल्या पत्नी व सासूला सोडून आरोपी त्याच्या दीड वर्षाच्या मुलीला बरोबर घेऊन घराबाहेर पडला. कात्रड येथील भाऊ गणेश साबळे याच्या घरी मुलीला सोडले. एवढ्या रात्री मुलीला घेऊन कशाला आलास, असे भावाने विचारल्यावर मुलगी रडत होती म्हणून तिला आणले, असे सांगून आरोपी फरार झाला.

शंका आल्याने भाऊ, भावजयी यांनी आरोपीच्या सासूचे घर गाठले. त्यामुळे घटना समोर आली. गणेश साबळे यांनी तत्काळ राहुरी पोलिस ठाण्यात माहिती कळविली. पोलिस अधीक्षक राकेश ओला, अपर पोलिस अधीक्षक स्वाती भोर, पोलिस उपअधीक्षक डॉ. बसवराज शिवपुजे, पोलिस निरिक्षक धनंजय जाधव, सहायक पोलिस निरीक्षक राजू लोखंडे, उपनिरीक्षक चारुदत्त खोंडे तत्काळ घटनास्थळी दाखल झाले.

आरोपीच्या शोधासाठी पोलिसांची दोन पथके रवाना झाली. दोन मृतदेह नगर येथे जिल्हा शासकीय रुग्णालयात उत्तरीय तपासणीसाठी हलविण्यात आले. बुधवारी सकाळी मृत सुरेखा दांगट यांचे बंधू भास्कर गंगाधर टेमक (वय ४९, रा. करजगाव, ता. नेवासे) यांच्या फिर्यादीवरून राहुरी पोलिस ठाण्यात आरोपी सागर विरुद्ध खुनाचा गुन्हा नोंदविण्यात आला.

दरम्यान, आज (बुधवारी) दुपारी एक वाजता धनगरवाडी (ता. नगर) येथे शिकारे यांच्या शेतातील एका चिंचेच्या झाडाला गळफास घेतलेल्या अवस्थेत आरोपी सागर साबळे (वय ३०) याचा मृतदेह पोलिसांना आढळला. याप्रकरणी नगर एमआयडीसी पोलिस ठाण्यात आकस्मात मृत्यूची नोंद करण्यात आली आहे.

घरजावई म्हणून राहणे नापसंत

घरजावई म्हणून राहणे आरोपी सागर सुरेश साबळे यास पसंत नव्हते. मंगळवारी सासू सुरेखा दांगट यांनी जावयासाठी धोंड्याचे जेवण केले होते. मात्र सततच्या वादामुळे साबळे हा धोंडे जेवणासाठी गेलाच नाही.