नगर तालुका ः गावपातळीवर ग्रामपंचायत सदस्य व सरपंच, उपसरपंचांना मुदतवाढ देण्याऐवजी प्रशासकांच्या ताब्यात गावगाड्याचा कारभार दिला गेला. तशा अधिकारी- कर्मचाऱ्यांच्या नियुक्‍त्याही सुरू झाल्या आहेत. वर्षानुवर्षे गावगाडा चालविणारे गावपुढारी भविष्यातील ग्रामपंचायत निवडणुका डोळ्यासमोर ठेवून "गावगुंडी' करण्यासाठी सरसावले आहेत. गावपातळीवरील रथी- महारथी एकमेकांवर आरोप- प्रत्यारोप, निवेदने, तक्रारींच्या माध्यमातून एकमेकांविरोधात शड्डू ठोकू लागले आहेत. 

कोरोनाच्या प्रभावाने राज्यातील बहुतेक ग्रामपंचायतींच्या निवडणुका बेमुदत पुढे ढकलण्यात आल्या. सरकारने आपल्या मर्जीतील कार्यकर्त्यांना ग्रामपंचायतीवर प्रशासकाच्या माध्यमातून हंगामी पदे देण्याचा घाट घातला होता. मात्र, त्यात न्यायालयाने हस्तक्षेप करीत शासकीय कर्मचाऱ्यांनाच ग्रामपंचायतींचा हंगामी कारभार पाहण्यास सांगितले. त्यानुसार आता तालुका पातळीवरील विविध विभागांत कार्यरत असलेल्या शासकीय कर्मचाऱ्यांच्या नियुक्‍त्या जाहीर केल्या जात आहेत. 

हेही वाचा - शिक्षकाने लिहिली नऊ हजार पानांची ज्ञानेश्वरी

कोरोनाचा प्रभाव संपताच गावात निवडणुका होतील व आपला गट पुन्हा गावगाडा चालविण्यासाठी सत्तेवर यावा, यासाठी गावपुढारी तयारीला लागले आहेत. वर्षानुवर्षे गावगाडा चालविणाऱ्या मुरब्बी पुढाऱ्यांपासून ते युवा वर्गानेही आरोप- प्रत्यारोप सुरू केले आहेत. जगाला, देशाला कोरोनाच्या पाशाने जखडले असताना गावकरी एकमेकांच्या जिरवा-जिरवीसाठी सज्ज झाले आहेत. 

संपादन - अशोक निंबाळकर