राहुरी : अहमदनगर जिल्हा मध्यवर्ती सहकारी बॅंकेने सभासद संस्थांना सन २०१९-२० व २०२१-२२ आर्थिक वर्षातील लाभांश द्यावा, तो साडेबारा टक्के असावा, अशी मागणी ज्येष्ठ नेते माजी खासदार प्रसाद तनपुरे यांनी केली आहे.तनपुरे यांनी प्रसिद्धीस दिलेल्या पत्रकात म्हटले आहे, की अहमदनगर जिल्हा मध्यवर्ती सहकारी बँकेचे सभासद असलेले साखर कारखाने, विविध कार्यकारी सहकारी सेवा संस्था, पतसंस्था, दूध संस्था, गृहनिर्माण संस्था व इतर सभासद संस्थांना सन २०१९-२० या आर्थिक वर्षातील लाभांश अद्याप वाटप केलेला नाही. सन २०२१-२२ आर्थिक वर्ष नुकतेच संपले आहे. त्यामुळे दोन्ही आर्थिक वर्षांतील लाभांशवाटपाचा निर्णय बँकेच्या संचालक मंडळाने लवकरात लवकर घ्यावा. सभासद संस्थांना साडेबारा टक्के लाभांश देऊन, आर्थिक मदतीचा दिलासा द्यावा.

शेतकऱ्यांची थकीत दोन लाखांपर्यंतची कर्जमाफी योजना राज्य सरकारने राबविली. त्यावेळी विविध कार्यकारी सोसायट्यांनी शासनाच्या अध्यादेशानुसार विहित मुदतीत शेतकऱ्यांच्या खात्यांवर कर्जमाफीचा जमा-खर्च केला. मात्र, शासनाकडून जिल्हा बँकेला सहा महिने विलंबाने कर्जमाफीची रक्कम प्राप्त झाली. त्यामुळे या विलंबित कालावधीतील कर्जमाफीच्या रकमेवरील व्याजाची झळ सोसायट्यांना बसू नये, यासाठी बँकेने व्याजाचा भुर्दंड सोसावा, अशी मागणी आपण केली होती. त्यास बँकेने सकारात्मक प्रतिसादही दिला होता. त्यामुळे तोट्यात जाऊ पाहणाऱ्या सोसायट्यांचे पुनरुज्जीवन झाले होते. आता सभासद संस्थांना लाभांश द्यावा, अशी मागणी तनपुरे यांनी केली आहे.