शिर्डी - राज्य सरकारच्या स्तरावर आपण सातत्याने पाठपुरावा केल्याने साईसंस्थानच्या आकृतिबंधातील मंजूर पदांवर नियुक्त असलेल्या ५९८ कर्मचाऱ्यांना न्याय मिळाला. या कंत्राटी कर्मचाऱ्यांना आता यापुढे चाळीस टक्के वेतनवाढ दिली जाईल. त्याबाबतचे आदेशदेखील जारी करण्यात आलेत. या कर्मचा-यांना सेवेत कायम करण्यासाठी आपण प्रयत्नशील आहोत, अशी माहिती महसूलमंत्री राधाकृष्ण विखे पाटील यांनी प्रसिद्धीला दिलेल्या पत्रकात दिली.

पत्रकात म्हटले आहे, की यापूर्वी आपण विधी व न्याय मंत्री असताना १०५२ कर्मचाऱ्यांना संस्थान सेवेत कायम करण्यासाठी पुढाकार घेतला होता. आता उर्वरित कर्मचाऱ्यांच्या वेतनवाढीच्या प्रस्तावाला मान्यता मिळावी, यासाठी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्याकडे व्यक्तिगत पाठपुरावा सुरू ठेवला होता. त्यास यश आले असून, विधी व न्याय विभागाने शासनादेश जारी करून ही ४० टक्के वेतनवाढ देण्यास कोणतीही हरकत नसल्याचे संस्थानला कळविले आहे.

या निर्णयामुळे या कंत्राटी कर्मचा-यांना फार मोठा दिलासा मिळणार आहे. मुख्यमंत्री एकनाथ शिंदे व उपमुख्यमंत्री देवेंद्र फडणवीस यांनी घेतलेल्या या निर्णयाबद्दल आपण त्यांचे आभार मानले आहेत.