पाथर्डी : नगर जिल्हा परिषदेतील तीन आजी-माजी सदस्यांना कोरोनामुळे जीव गमवावा लागला. यात पाथर्डी तालुक्यातील दोघांचा समावेश आहे. शिवसेनेची तोफ म्हणून ओळखले जाणाऱ्या मोहन जीवनाजी पालवे (वय ६५) यांची प्राणज्योत मालवली. (Shiv Sena leader Mohanrao Palve passes away)

तालुक्यातील करंजी-मिरी जिल्हा परिषद गटाचे गेली पंधरा वर्षे नेतृत्व केलेले व शिवसेनेचे माजी तालुकाप्रमुख म्हणून मोहन पालवे नगर येथील एका खाजगी हॉस्पिटलमध्ये उपचार घेत होते. गेल्या पंधरा दिवसांपासून ते कोरोना झाल्यामुळे मृत्यूशी झुंज देत होते.

उपचार सुरू असतानाच गुरुवारी रात्री पावणे दहा वाजण्याच्या सुमारास त्यांनी अखेरचा श्वास घेतला. त्यांच्या निधनाची बातमी वाऱ्यासारखी पसरली. शिवसेनाप्रमुख बाळासाहेब ठाकरे व पद्मभूषण बाळासाहेब विखे पाटील, लोकनेते गोपीनाथ मुंडे यांच्यावर मोठी निष्ठा आणि श्रद्धा असणाऱ्या मोहन पालवे यांच्या निधनामुळे पाथर्डी तालुक्यातून मोठे दुख व्यक्त करण्यात येत आहे. गावागावात त्यांनी शिवसेनेची शाखा काढली होती. एकाच गटातून ते पंधरा वर्षे सदस्य राहिले.

त्यांच्या पश्‍चात दोन मुले, तीन मुली, सुना, नातवंडे असा परिवार आहे. सलग पंधरा वर्ष त्यांनी मिरी-करंजी जिल्हा परिषद गटाचे नेतृत्व केले होते. अतिशय प्रतिकूल परिस्थितीवर मात करून यांनी राजकारणामध्ये एक मानाचे स्थान मिळवले होते. एक ट्रक ड्रायव्हर ते जिल्हा परिषद सदस्य असा त्यांचा जीवनाचा प्रवास राहिला. गुरुवारी रात्री उशिरा कोल्हार या त्यांच्या गावी त्यांच्यावर अंतकरणाने अंत्यसंस्कार करण्यात आले.(Shiv Sena leader Mohanrao Palve passes away)