श्रीरामपूर : नगरपालिकेची प्रारूप प्रभाग रचना (ता. १०) प्रसिद्ध झाली. नगरसेवकांची संख्या ३२ वरून ३४ झाली आहे. नव्या रचनेनुसार अनेक प्रस्थापितांचे भाग सुरक्षित झाले, तर काहींना आगामी निवडणुकीत फटकाही बसू शकतो. नव्या रचनेमुळे पालिकेतील राजकीय गणिते बदलू शकतात.

रेल्वे लाईनच्या पलिकडील भागातून १८ नगरसेवक निवडून जाणार असल्याने या भागाकडे नगराध्यक्ष पदासाठी इच्छुक असणाऱ्यांच्या नजरा असतील, असा अंदाज राजकीय तज्ञांकडून व्यक्त केला जात आहे. पालिकेचे मुख्याधिकारी गणेश शिंदे यांनी आज (ता. १०) प्रभाग रचनेचे प्रारूप प्रसिद्ध केले. यावर १० ते १७ मार्चपर्यंत हरकती व सूचना मुख्याधिकाऱ्यांकडे नोंदवायचे आहेत. २२ मार्च रोजी जिल्हाधिकारी आलेल्या हरकती व सूचनांवर सुनावणी घेणार आहेत.

श्रीरामपूर शहराची लोकसंख्या ८९ हजार २८२ इतकी असून त्यात अनुसूचित जाती १६ हजार ६८८ व अनुसूचित जमाती १ हजार ९७३ इतकी लोकसंख्या आहे. प्रत्येक प्रभागासाठी सरासरी ५२५२ मतदार असतील. त्यात १० टक्के कमी अधिक होऊ शकतात. याआधारे एकूण १७ प्रभागातून पालिकेत ३४ नगरसेवक निवडून द्यायचे आहेत. १३ सर्वसाधारण महिला, सहा जागा अनुसूचित जाती (पैकी ३ महिला), एक अनुसूचित जमाती (महिला), १४ जागा सर्वसाधारण या पद्धतीने सदस्य निवडून द्यायचे आहेत. लोकसंख्येनुसार प्रभाग २, ३, ५, ६, ७ व ११ मधील प्रत्येकी एक जागा अनुसूचित जाती, तर प्रभाग १३ मधील एक जागा अनुसूचित जमातीसाठी राखीव असेल.

प्रभाग प्रमुख पुढीलप्रमाणे : प्रभाग १ फातेमा हाउसिंग, झिरंगेवस्ती, गुरुनानक परिसर, प्रभाग २ गोंधवणी परिसर, प्रभाग ३ तहसील कचेरी परिसर, प्रभाग ४ मौलाना आझाद चौक परिसर, प्रभाग ५ बोरावके महाविद्यालय परिसर, प्रभाग ६ कांदा मार्केट परिसर, प्रभाग ७ राम मंदिर परिसर, प्रभाग ८ अखंडानंद आश्रम परिसर, प्रभाग ९ गुरुद्वारा, बागवान गल्ली, नेहरूनगर परिसर, प्रभाग १० बीफ मार्केट व गौसिया मस्जिद परिसर, प्रभाग ११ बजरंग चौक परिसर, प्रभाग १२ संजय नगर, इदगाह मैदान परिसर, प्रभाग १३ गजानन वसाहत, बाजारतळ, वडारवाडा झोपडपट्टी, गौंडगल्ली परिसर, प्रभाग १४ जनता हायस्कूल परिसर, प्रभाग १५ बोरावकेनगर,सुर्यानगर परिसर, प्रभाग १६ सरस्वती कॉलनी परिसर, प्रभाग १७ पूर्णवादनगर.