Akola News : महान येथील पशुवैद्यकीय दवाखाना श्रेणी २ असून, याअंतर्गत एकूण २१ गावे आहेत. या मोठ्या दवाखान्यात कायमस्वरुपी पशुवैद्यकीय अधिकारी अनेक महिन्यांपासून नसल्याने परिसरातील पशुंचा उपचार प्रभारी पशुवैद्यकीय अधिकारी यांच्या खांद्यावर आहे. परंतु, हेच प्रभारी पशुवैद्यकीय अधिकारी आठवड्यातून दोनच दिवस हजेरी लावत असल्यामुळे त्याचा त्याचा फटका परिसरातील पशुपालकांना बसत आहे.

अधिकारी व कर्मचारी दवाखान्यात उपस्थित नसल्याने शेतात युरिया खाल्ल्याने बकरीचा उपचाराअभावी मृत्यू झाल्याची घटना ता. २ सप्टेंबर रोजी दुपारी दोन वाजताच्या सुमारास घडली.

वस्तापूर येथील पशुपालक गुलाब भीमराव पावले यांच्या बकरीने शेतात युरिया खाल्ल्याने तिला उपचाराठी महान येथील पशुवैद्यकीय दवाखान्यात आणण्यात आणले. परंतु, या ठिकाणी नेहमीच अधिकारी व कर्मचारी उपस्थित नसल्याने उपचाराअभावी बकरीचा मृत्यू झाल्याचे खासगी डॉक्टरांनी सांगितले.

पशु दवाखान्यात २४ तास पशुवैद्यकीय अधिकारी मुख्यालयी असणे महत्वाचे आहे. दवाखान्याचा प्रभारी वरखेड येथील पशु दवाखान्याचे अधिकारी डॉ.सय्यद मोहसीन यांचेकडे असून, ते आठवड्यातून दोन दिवसच येथील पशु दवाखान्यात हजर असतात.

वरखेड अंतर्गत १२ खेडी आणि महान पशु दवाखान्या अंतर्गत येणारे एकूण २१ खेडी, असे एकूण ३३ खेडीगावांतील पशूंचा उपचाराची जबाबरदारी केवळ एकच पशुवैद्यकीय अधिकाऱ्यांच्या खांद्यावर आहे.

याठिकाणी कायमस्वरुपी पशुवैद्यकीय अधिकारी देण्यात यावा याबाबत अनेक वेळा संबंधित विभागाच्या वरिष्ठांना मागणी केली असता, मार्च अखेर कायमस्वरुपी पशुवैद्यकिय अधिकारी देण्यात येईल, असे आश्वासनं वरिष्ठांकडून देण्यात आले. आश्‍वासनाची पूर्तता न झाल्यामुळे पशुपालकांना खागसी डॉक्टरांकडून उपचार घेऊन आर्थिक झळ सहन करावी लागत आहे.

माझी कायमस्वरुपी नेमणूक वरखेड पशुदवाखाना श्रेणी २ येथे असून, महान येथील पशु दवाखान्याचा प्रभार माझ्याकडे दिल्याने आठवड्यातून मंगळवार आणि शुक्रवार या दोन दिवशी महान येथील पशुदवाखान्यात पशुपालकांना सेवा देतो. इतर दिवस वरखेड मुख्यालयात उपस्थित असतो.

- डॉ.सय्यद मोहसीन, प्रभारी पशुवैद्यकीय

अधिकारी, महान.