अकोला ः कोकणातील हापूस आंबा तसा जगभरात प्रसिद्ध आहे. अकोलेकरांनाही त्याची चांगलीच गोडी असून, दरवर्षी अकोल्याच्या बाजारात तो विक्रीसाठी येत असतो. मात्र, कोरोनामुळे इतर फळांसोबतच हापूस खरेदी-विक्रीची सुद्धा अडचण झाली आहे. परंतु, या विपरीत परिस्थितीलाही अर्थार्जनाची संधी बनवित अकोल्यातील शेकडो युवकांनी साखळी व्यवसायातून घरपोच हापूस विक्री करण्याचा बेत आखला आहे आणि व्यावसायीक दृष्टीकोन ठेऊन अनेकांनी हापूस खरेदीसाठी कोकणात हजेरी सुद्धा लावली आहे.

प्रशासनाचाही सक्रिय सहभाग
कोरोनाचा प्रादूर्भाव टाळण्यासाठी, नागरिकांच्या सुरक्षेचा विचार करून आणि अडचणीच्या काळात अर्थार्जनाचा प्रर्याय म्हणून, गेल्यावर्षी लॉकडाउन कालावधीत भाजीपाला, फळे व इतर जिवनावश्‍यक वस्तूंचा पुरवठा घरपोच करण्यासाठी जिल्ह्यातील सामाजिक संस्था, विविध बचत गट, शेतकरी बचत गट व शेकडो बेरोजगार युवकांनी पुढाकार घेतला होता. जिल्ह्यातील कृषी विभाग, आत्मा व जिल्हा उपनिबंधक कार्यालयाने सुद्धा या साखळी व्यवसायात सक्रिय सहभाग घेत लोकांना घरपोच फळे, भाजीपाला व जिवनावश्‍यक वस्तूंचा पुरवठा केला. याच साखळ्याच्या माध्यमातून लॉकडाउन कालावधीतही अकोलेकरांना देवगड, रत्नागिरीच्या हापूस आंब्याची चव गेल्यावर्षी चाखता आली.
(संपादन - विवेक मेतकर)