अकोला - जिल्ह्यातील अंत्योदय अन्न योजना व प्राधान्य कुटुंबातील लाभार्थ्यांना ऑक्टोबर महिन्यात गव्हा ऐवजी ज्वारीचे वाटप करण्यात येत आहे. त्यामुळे दसरा व दिवाळी सारख्या सण, उत्सवाच्या काळात गरिब लाभार्थ्यांच्या ताटातून पोळी गायब होणार असून ज्वारीच्या भाकरीवरच आनंद साजरा करावा लागणार आहे.

राष्ट्रीय अन्नसुरक्षा अधिनियमाअंतर्गत जिल्ह्यातील हजारो गोरगरीबांना अनुदानित दराने धान्याचे वाटप करण्यात येते. त्यामध्ये शहरी व ग्रामीण क्षेत्रात राहणाऱ्या लाेकांचा समावेश आहे. या योजनेची अंमलबजावणी करण्याचे अधिकार हे जिल्हा पुरवठा अधिकाऱ्यांचे आहेत.

त्यामुळे जिल्हा पुरवठा विभागामार्फत स्वस्त धान्य दुकानदारांच्या माध्यमातून जिल्ह्यातील अंत्योदय व प्राधान्य गटातील हजारो पात्र रेशन कार्डधारकांना सवलतीच्या दरात धान्याचे वाटप करण्यात येत होते. परंतु सध्या लाभार्थ्यांना शासन आदेशानुसार मोफतच धान्याचे वाटप करण्यात येत आहे. अनेक लाभार्थी कुटुंबांचा संपूर्ण उदरनिर्वाह याच धान्यातून होतो. या धान्य वाटपाचे प्रमाण शासनाने निश्चित केले आहे.

रब्बी पणन हंगाम २०२३-२४ मध्ये जिल्हा मार्केटिंग अधिकारी यांना ज्वारी खरेदी केल्यामुळे जिल्ह्यातील अंत्योदय व प्राधान्य गटातील लाभार्थ्यांना रेशनच्या दुकानातून सणासुदीच्या काळात गव्हा ऐवजी ज्वारीचे वाटप करण्यात येत आहे. याबाबतचे आदेश जिल्हा पुरवठा अधिकारी निखील खेमनार यांनी दिले आहेत.

पुरवठा विभागाने मंजूर केलेले नियतन

शहरी भागातील प्राधान्य गटातील तीन लाख ३८ हजार ६६६ लाभार्थ्यांसाठी पुरवठा विभागाने तीन हजार ३७१.४२ क्विंटल ज्वारीचे तर १३ हजार ४६८.४४ क्विंटल तांदुळाचे नियमत मंजूर केले आहे. शहरी भागातील प्राधान्य गटातील सात हजार ८६ कार्डधारकांसाठी ७०८.३० क्विंटल ज्वारी तर एक हजार ७६९ क्विंटल तांदुळाचे नियतन मंजूर केले आहे.

ग्रामीण भागातील सात लाख ७६ हजार ४१९ प्राधान्य गटातील लाभार्थ्यांना सात हजार ८६८.५८ क्विंटल ज्वारी व ३१ हजार ४७१.५६ क्विंटल तांदुळाचे व ३८ हजार ४९२ अंत्योदय लाभार्थ्यांसाठी तीन हजार ८५१.७० क्विंटल ज्वारी व नऊ हजार ६२१ क्विंटल तांदुळाचे नियतन मंजूर करण्यात आले आहे.