मोताळा (जि.बुलडाणा) : ट्रक व एसटी बसचा अपघात झाल्याची घटना बुलडाणा-मलकापूर मार्गावरील मोहेगावनजीक रविवारी (ता.१९) सकाळी नऊ वाजताच्या सुमारास घडली. या अपघातात काही प्रवासी जखमी झाले असून, जखमींना उपचारासाठी जिल्हा सामान्य हलविण्यात आल्याची माहीती आहे.

सविस्तर असे की, एसटी बस क्रमांक एम.एच. १४ बी.टी. ४७५७ ही गाडी प्रवासी घेऊन सोनाळा येथून बुलडाणा जात होती. दरम्यान, रविवारी सकाळी नऊ वाजताच्या सुमारास बुलडाणा-मलकापूर मार्गावरील मोहेगाव फाट्यानजीक समोरून भरधाव येणाऱ्या ट्रक व एसटी बसचा अपघात झाला. या अपघातात काही प्रवासी जखमी झाले.

अपघात घडल्यावर ट्रक रस्त्याच्या कडेला पलटी झाला. तर, एसटी बसचा बाजूचा पत्रा चिरल्या गेला. नागरिकांनी घटनास्थळी मदतकार्य करून जखमींना गाडीतून बाहेर काढले. वृत्त लिहिपर्यंत सात जखमींना जिल्हा सामान्य रुग्णालयात हलविण्यात आल्याची माहिती आहे.