अकोला - जिल्हा परिषदेच्या हातरुण सर्कलसाठी सुरु असलेली प्रचाराची रणधुमाळी शुक्रवारी (ता. २) संपेल. या सर्कलसाठी रविवारी (ता. ५) मतदान होणार असून १७ हजार १७८ मतदार मतदानाचा हक्क बजावतील. याव्यतिरिक्त ग्रामपंचायत पोटनिवडणुकीत सहा जागांसाठी सुद्धा ५ जून रोजीच मतदान होणार आहे. त्यानंतर सोमवारी (ता. ६) मतमोजणी करण्यात येईल.

शिवसेनेच्या हातरूण सर्कलच्या जिल्हा परिषद सदस्या सुनिता सुरेश गाेरे यांना विभागीय आयुक्तांनी पुन्हा अपात्र घाेषित केल्यानंतर काही दिवसांपूर्वी राज्य निवडणूक आयाेगाने निवडणुकीचा कार्यक्रम जाहीर केला हाेता. या सर्कलसाठी निवडणूक जाहीर झाल्याने संख्याबळ कायम ठेवण्याचे आव्हान शिवसेनेसमाेर उभे आहे, तर दुसरीकडे एक सदस्य वाढविण्याची संधी सत्ताधारी वंचित बहुजन आघाडीला आहे. त्यामुळे सदर पोटनिवडणूक अतिशय चुरशीची आहे. या निवडणुकीत कॉंग्रेस, शिवसेना, भाजप व वंचितच्या उमेदवारांमध्येच थेट लढत होणार आहे, तर एकमात्र अपक्ष सदस्य सुद्धा निवडणुकीच्या मैदानात आहे. या निवडणुकीत कोणत्या पक्षाचा उमेदवार विजयी होतो त्यावर सत्ता समीकरण अवलंबून असल्याने ही निवडणूक सत्ताधारी वंचित व विरोधातील इतर पक्षांसाठी अतिशय महत्वाची आहे.

या ग्रामपंचायतींमध्येही संपणार प्रचार

मूर्तिजापूर तालुक्यातील मधापूरी येथील प्रभाग क्रमांक दोन, सोनाळा येथील प्रभाग क्रमांक तीन, अकोला तालुक्यातील अन्वी येथील प्रभाग क्रमांक एक, सांगवी मोहाडी येथील प्रभाग क्रमांक तीन. बाळापूर तालुक्यातील बटवाडी बु. येथील प्रभाग क्रमांक तीन, गायगाव येथील प्रभाग क्रमांक चार या ग्रामपंचायतींच्या प्रभागांसाठी प्रत्यक्ष मतदान होणार आहे.