बुलडाणा : मुख्यमंत्री म्हणून खरे काम जर कुणी केले असेल तर ते देवेंद्र फडणवीसांनी. सकाळी ९ वाजतापासून रात्रीचे ३ वाजेपर्यंत मंत्रालयात, रामगिरीमध्ये आणि वर्षा या निवासस्थानी त्यांनी काम केले. त्यांच्या काळात राज्य विकासाच्या वाट्यावर निघाले होते. खरी विकासाची कामे कुणी केली असेल, तर ती फडणवीस यांनी केली आहे. भविष्याचा वेध घेणारे आणि उत्कृष्ट व्हिजन असणारे मुख्यमंत्री फडणवीस होते. या मुख्यमंत्र्यांमध्ये ती बात नाही, असे भाजपचे प्रदेश सरचिटणीस चंद्रशेखर बावनकुळे म्हणाले.

बुलडाणा जिल्ह्यातील सिंदखेडराजा येथे सोमवारी आयोजित पत्रकार परिषदेत ते बोलत होते. पंचम या संस्थेने सर्व्हे करून उत्कृष्ट मुख्यमंत्री म्हणून उद्धव ठाकरे यांना पसंती दिली आहे, असे विचारल्यावर बावनकुळे यांनी मुख्यमंत्र्यांवर सडकून टीका केली. हा सर्वे कुणी केला माहिती नाही. पण असा मुख्यमंत्री पहिल्या पाचमध्ये काय ५० मध्येही येऊ शकत नाही. कोरोनाच्या पहिल्या आणि दुसऱ्या लाटेत हाहाकार उडाला होता. जिवाच्या भीतीने जनता उपचार मिळविण्यासाठी धडपडत होती. या काळात राज्याचा प्रमुख म्हणून मुख्यमंत्र्यांची जबाबदारी मोठी होती. परंतु, मुख्यमंत्री उद्धव ठाकरे १४ महिने मंत्रालयात आलेच नाही. तेव्हा असा मुख्यमंत्री उत्कृष्ट कसा, असा थेट सवाल करीत चंद्रशेखर बावनकुळे यांनी मुख्यमंत्र्यांवर निशाणा साधला.

महाराष्ट्रातल्या १२ कोटी जनतेला विचारा

महाराष्ट्रातल्या १२ कोटी जनतेला विचारा, लोकच तुम्हाला सांगतील की, असा मुख्यमंत्री आम्ही पाहिला नाही आणि पहिल्या पाचमध्ये येणे शक्य नाही. विदर्भात अधिवेशन घ्यायला जे घाबरतात, ते मुख्यमंत्री उत्कृष्ट कसे असू शकतात, असाही सवाल चंद्रशेखर बावनकुळे यांनी केला.